പത്തനംതിട്ട: ബ്ലഡി കണ്ണൂര്‍ എന്ന പരാമര്‍ശം നടത്തിയ ഗവര്‍ണര്‍ക്കെതിരെ മുഖ്യമന്ത്രി പിണറായി വിജയന്‍. വാക്ക് പറയുമ്പോള്‍ ഗവര്‍ണര്‍ സൂക്ഷിക്കണമെന്ന് പിണറായി മുന്നറിയിപ്പ് നല്‍കി.
പ്രതിഷേധത്തെ തല്ലി ഒതുക്കാമെന്നാണോ ? വിവരദോഷത്തിന് അതിര് വേണം. കയറൂരി വിടുന്നവര്‍ ശ്രദ്ധിച്ചാല്‍ നല്ലതെന്നും മുഖ്യമന്ത്രി പറഞ്ഞു.മുഖ്യമന്ത്രി സ്ഥാനത്തിരിക്കുന്നതിനാല്‍ ഇത്രയേ പറയുന്നുളളൂ- പിണറായി പറഞ്ഞു.
കണ്ണൂര്‍ എന്താണെന്ന് ഗവര്‍ണര്‍ക്ക് അറിയില്ല. പഴശ്ശിയും കേരള വര്‍മ്മയും എവിടെത്തുകാരാണെന്ന് ഗവര്‍ണര്‍ക്കറിയില്ല. കയ്യൂര്‍ സമര സഖാക്കളെ ഗവര്‍ണര്‍ക്ക് അറിയില്ല. ഉപ്പ് സത്യഗ്രഹം നടന്ന നാടാണ്. കേരളവും കണ്ണൂരും എന്താണെന്ന് ഗവര്‍ണര്‍ക്ക് അറിയില്ലെന്നും പിണറായി പറഞ്ഞു.
ആരിഫ് മുഹമ്മദ് ഖാന്‍ ഇന്ത്യന്‍ രാഷ്‌ട്രീയത്തിലെ അവസരവാദിയാണെന്നും പിണറായി പറഞ്ഞു. അടൂര്‍ നവകേരള സദസിലാണ് മുഖ്യമന്ത്രിയുടെ മുന്നറിയിപ്പ്.
കണ്ണൂരിലെ കൊലപാതകങ്ങളെയും സി പി എമ്മിന്റെ അക്രമങ്ങളെയും സൂചിപ്പിച്ചാണ് ഗവര്‍ണര്‍ ബ്ലഡി കണ്ണൂര്‍ പരാമര്‍ശം നടത്തിയത്.
തനിക്കെതിരെ എസ് എഫ് ഐ ഗുണ്ടകളെ ഇറക്കി സമരം ചെയ്യുന്നതിന് പിന്നില്‍ മുഖ്യമന്ത്രിയാണെന്ന് ഗവര്‍ണര്‍ പറഞ്ഞിരുന്നു.
പ്രതികരിക്കാൻ ഇവിടെ എഴുതുക: