കോട്ടയം: യുവാവിനെ തല്ലിക്കൊന്ന് പോലീസ് സ്‌റ്റേഷനിലിട്ട സംഭവത്തിലെ പ്രതിയായ യുവാവിനെ വീട് കയറി ആക്രമിച്ച് കൊലപ്പെടുത്താൻ ശ്രമം നടത്തി ഗുണ്ടാസംഘം. സംഭവത്തിൽ അഞ്ച് പേരെയാണ് പോലീസ് അറസ്റ്റ് ചെയ്തത്. മണർകാട് സ്വദേശി പ്രവീൺ രാജു, കൂരോപ്പട ളാക്കാട്ടൂർ സ്വദേശി ഉണ്ണിക്കുട്ടൻ, മണർകാട് സ്വദേശി സനുമോൻ, അയർക്കുന്നം അമയന്നൂർ സ്വദേശി ശരത് ശശി, കോട്ടയം കളക്ട്രേറ്റ് സ്വദേശി ജിജിൻ ഫിലിപ്പ് എന്നിവരെയാണ് മണർകാട് പോലീസ് അറസ്റ്റ് ചെയ്തത്.
മണർകാട് പറപ്പള്ളിക്കുന്ന് കുന്നംപള്ളിൽ കെഎസ് സുധീഷിനെയാണ് പുലർച്ചയോടെ വീടാക്രമിച്ച് കൊലപ്പെടുത്താൻ ശ്രമിച്ചത്. ബുധനാഴ്ച പുലർച്ചയോടെയായിരുന്നു വടിയും കല്ലും ഉപയോഗിച്ച് ആക്രമണം നടത്തിയത്. ഗുണ്ടാ സംഘങ്ങൾക്കിടയിലുണ്ടായ തർക്കമാണ് ആക്രമണത്തിൽ കലാശിച്ചതെന്ന് പോലീസ് പറയുന്നു. എന്നാൽ അറസ്റ്റിലായ പ്രതികൾക്കൊപ്പം സഹകരിച്ച് പ്രവർത്തിക്കാൻ തയാറാകാത്തത് മൂലമുള്ള വിരോധമാണ് ആക്രമണത്തിന് കാരണമെന്നാണ് സുധീഷ് പോലീസിന് നൽകിയിരിക്കുന്ന മൊഴി.
പരാതിയുടെ അടിസ്ഥാനത്തിൽ കേസെടുത്ത പോലീസ് വിവിധയിടങ്ങളിലായി ഒളിവിൽ കഴിഞ്ഞിരുന്ന പ്രതികളെ പിടികൂടുകയായിരുന്നു. പ്രതികളിൽ പ്രവീൺ രാജുവും ജിജിൻ ഫിലിപ്പും മണർകാട് സ്റ്റേഷനിലെ സാമൂഹ്യ വിരുദ്ധ പട്ടികയിൽ ഉൾപ്പെട്ടവരാണ്. ഉണ്ണിക്കുട്ടന് പാമ്പാടി, കോട്ടയം വെസ്റ്റ് എന്നീ സ്റ്റേഷനുകളിലും, ശരത്ത് ശശിക്ക് കോട്ടയം ഈസ്റ്റ്, അയർക്കുന്നം, പാമ്പാടി, പാലാ എന്നീ സ്റ്റേഷനുകളിലും ക്രിമിനൽ കേസുകൾ നിലവിലുണ്ടെന്ന് പോലീസ് പറഞ്ഞു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.
പ്രതികരിക്കാൻ ഇവിടെ എഴുതുക: