മോസ്‌കോ: നെവാഡയില്‍ അമേരിക്ക നടത്തിയ ആണവ പരീക്ഷണത്തിനെതിരെ റഷ്യ രംഗത്ത്. നെവാഡയിലെ ആണവ പരീക്ഷണ കേന്ദ്രത്തില്‍ യുഎസ് നടത്തിയ പരീക്ഷണത്തില്‍ രാജ്യാന്തര വിലയിരുത്തല്‍ വേണമെന്നാണ് റഷ്യയുടെ ആവശ്യം. സമഗ്ര ആണവ പരീക്ഷണ നിരോധന ഉടമ്പടിയുടെ (സിടിബിടി) ലംഘനമാണിതെന്നും റഷ്യ ആരോപിച്ചു.
ആണവ സ്‌ഫോടനങ്ങള്‍ കണ്ടെത്തുന്നതിനു സഹായകമായ പരീക്ഷണമാണു കഴിഞ്ഞ ദിവസം നടത്തിയതെന്നാണ് അമേരിക്ക പറയുന്നത്. ആണവ നിര്‍വ്യാപന ലക്ഷ്യങ്ങള്‍ക്കു സഹായകമാകുന്നതാണു നടപടിയെന്നുമാണ് യുഎസിന്റെ വാദം. സിടിബിടിക്ക് ആഭ്യന്തരമായി നല്കിയ അംഗീകാരത്തില്‍നിന്നു പിന്മാറുന്നതിനുള്ള ബില്‍ റഷ്യന്‍ അധോസഭയായ ഡ്യൂമ ഏകസ്വരത്തില്‍ അംഗീകരിച്ചിരുന്നു.
ഇതിന് പിന്നാലെയാണു യുഎസിന്റെ നടപടി. എന്നാല്‍, സിടിബിടിക്ക് അംഗീകാരം നല്കാന്‍ യുഎസ് തയാറാകാത്തതാണു തങ്ങള്‍ നല്കിയ അംഗീകാരം പിന്‍വലിക്കുന്നതിന് റഷ്യ പറയുന്ന കാരണം. ഇതു ബില്ലില്‍ വ്യക്തമാക്കിയിട്ടുമുണ്ട്.
റഷ്യയുടെ ഉപരിസഭയായ ഫെഡറല്‍ കൗണ്‍സില്‍ അംഗീകരിച്ച് പ്രസിഡന്റ് വഌദിമീര്‍ പുടിന്‍ ഒപ്പുവയ്‌ക്കുന്നതോടെ ബില്‍ പ്രാബല്യത്തിലാകും. ഉടമ്പടിക്കു നല്കിയ അംഗീകാരത്തില്‍നിന്നു പിന്‍മാറുന്നുവെങ്കിലും, ആണവ പരീക്ഷണങ്ങള്‍ സംബന്ധിച്ച് രാജ്യാന്തര നിരീക്ഷണ സംവിധാനത്തിന് വിവരങ്ങള്‍ നല്കുന്നതും പരീക്ഷണങ്ങള്‍ക്ക് ഏര്‍പ്പെടുത്തിയ മോറട്ടോറിയവും തുടരുമെന്ന് റഷ്യ വ്യക്തമാക്കിയിട്ടുണ്ട്.
പ്രതികരിക്കാൻ ഇവിടെ എഴുതുക: