പട്‌ന: മൂന്നുവയസ്സുകാരിയെ ബലാത്സംഗം ചെയ്ത് കൊന്ന് കുഴിച്ചിട്ടു. സംഭവത്തിൽ 20-കാരൻ ലാല്‍ ബാബുവിനെ പോലീസ് അറസ്റ്റ് ചെയ്തു.
മുസാഫര്‍പുരിലാണ് സംഭവം. മാതാപിതാക്കളോടൊപ്പം ബന്ധുവീട്ടിലെത്തിയ പെണ്‍കുട്ടിയാണ് അതിക്രൂരമായ ബലാത്സംഗത്തിനിരയായി കൊല്ലപ്പെട്ടത്. ബന്ധുവീട്ടിലെത്തിയ പെണ്‍കുട്ടിയെ സമീപവാസിയായ ലാല്‍ ബാബു വെള്ളിയാഴ്ച വൈകുന്നേരം കളിക്കാനായി പുറത്തേക്ക് കൊണ്ടുപോയിരുന്നു.
കുട്ടിയുടെ അമ്മയോട് അനുവാദം ചോദിച്ചാണ് ആദ്യതവണ ഇയാള്‍ കുട്ടിയെ വീടിന് പുറത്തേക്ക് കൊണ്ടുപോയത്. അല്പസമയത്തിന് ശേഷം കുട്ടിയെ തിരികെ വീട്ടിലെത്തിക്കുകയും ചെയ്തു. തുടര്‍ന്ന് രാത്രി പത്തുമണിയോടെ ആരുമറിയാതെ ഇയാള്‍ വീണ്ടും കുട്ടിയെ വീട്ടില്‍നിന്ന് കൂട്ടിക്കൊണ്ടുപോയെന്നാണ് പോലീസ് പറയുന്നത്. ആളൊഴിഞ്ഞ സ്ഥലത്തെത്തിച്ച് പെണ്‍കുട്ടിയെ ബലാത്സംഗം ചെയ്ത് കൊലപ്പെടുത്തുകയും കൃഷിയിടത്തില്‍ മൃതദേഹം കുഴിച്ചിടുകയുമായിരുന്നു.
രാത്രി കുട്ടിയെ കാണാതായതോടെയാണ് മാതാപിതാക്കളും ബന്ധുക്കളും തിരച്ചില്‍ ആരംഭിച്ചത്. സംശയത്തെത്തുടര്‍ന്ന് ഇവര്‍ ലാല്‍ബാബുവിനെ ഫോണില്‍ വിളിച്ചെങ്കിലും ഇയാള്‍ പ്രതികരിച്ചില്ല. ഇതോടെ ബന്ധുക്കള്‍ പോലീസിനെ വിവരമറിച്ചു. തുടർന്ന് നടത്തിയ തിരച്ചിലിലാണ് കുട്ടിയുടെ മൃതദേഹം കണ്ടെത്തിയത്.
പ്രതികരിക്കാൻ ഇവിടെ എഴുതുക: