ബോളിവുഡ് താരങ്ങളായ രണ്ദീപ് ഹൂഡയും ലിന് ലൈഷ്റാമും വിവാഹിതരാകുന്നു. ഈ മാസം മണിപ്പൂര് തലസ്ഥാനമായ ഇംഫാലില് വച്ച് വിവാഹിതരാകുമെന്ന് ഇരുവരും അറിയിച്ചു. മുംബൈയില് വിവാഹ സല്ക്കാരവും ഉണ്ടാകും.
മണിപ്പൂര് സ്വദേശിനിയാണ് ലിന്. രണ്ദീപും ലിന്നും ഇന്സ്റ്റാഗ്രാമിലൂടെയാണ് വിവാഹ വാര്ത്ത പുറത്തുവിട്ടത്.മഹാഭാരതത്തില് അര്ജുനന് മണിപ്പൂരി രാജകുമാരിയും യോദ്ധവുമായ ചിത്രാംഗദയെ വിവാഹം കഴിച്ച കഥയുണ്ടെന്ന് കുറിച്ചു കൊണ്ടാണ് ഇവര് വിവാഹ വാര്ത്ത പങ്കുവച്ചത്. ഇരു വീട്ടുകാരുടെയും സുഹൃത്തുക്കളുടെയും അനുഗ്രഹത്തോടെ വിവാഹിതരാകുന്നു. വിവാഹം നവംബര് 29-ന് മണിപ്പൂര് തലസ്ഥാനമായ ഇംഫാലില് നടക്കുമെന്നും തുടര്ന്ന് മുംബൈയില് സ്വീകരണവും ഉണ്ടാകുമെന്ന് അറിയിക്കുന്നതില് ഞങ്ങള്ക്ക് അതിയായ സന്തോഷമുണ്ട്. ഞങ്ങള് ജീവിതം ആരംഭിക്കുമ്പോള്, സംസ്കാരങ്ങളുടെ സംഗമത്തിനായി ഞങ്ങള് നിങ്ങളുടെ അനുഗ്രഹവും സ്നേഹവും തേടുന്നു- രണ്ദീപും ലിന്നും ഇന്സ്റ്റാഗ്രാമില് കുറിച്ചു.
2007-ല് ഓം ശാന്തി ഓം എന്ന ചിത്രത്തിലൂടെയാണ് ലിന് ബോളിവുഡില് അരങ്ങേറ്റം കുറിച്ചത്. അതില് ഷാരൂഖ് ഖാന്റെ സുഹൃത്തായി അതിഥി വേഷം ചെയ്തു. മേരി കോം (2014) ബെം, ഉമ്രിക (2015) , റംഗൂണ് (2017) മേമ, ഖാഇദി ബാന്ഡ് (2017), ആക്സോണ് (2019) എന്നിവയാണ് മറ്റ് ബോളിവുഡ് ചിത്രങ്ങള്.
അതേസമയം, സ്വതന്ത്ര വീര് സവര്ക്കര് എന്ന സിനിമയിലാണ് രണ്ദീപ് ഹൂഡ അടുത്തതായി അഭിനയിക്കുന്നത്. വീര് സവര്ക്കര് എന്നറിയപ്പെടുന്ന സ്വാതന്ത്ര്യ സമര സേനാനി വിനായക് ദാമോദര് സവര്ക്കറുടെ ജീവചരിത്രമാണ് ഈ ചിത്രത്തില് അവതരിപ്പിക്കുക. ഉത്കര്ഷ് നൈതാനിയും രണ്ദീപ് ഹൂഡയും ചേര്ന്ന സംവിധാനവും രചനയും നിര്വ്വഹിച്ച ഈ ചിത്രം നിര്മ്മിക്കുന്നത് ആനന്ദ് പണ്ഡിറ്റ് മോഷന് പിക്ചേഴ്സും രണ്ദീപ് ഹൂഡ ഫിലിംസും ലെജന്ഡ് സ്റ്റുഡിയോസും അവക് ഫിലിംസും ചേര്ന്നാണ്.
