ന്യൂദല്‍ഹി : രണ്ട് മാസത്തെ ഇടവേളയ്ക്ക് ശേഷം കാനഡക്കാര്‍ക്കുള്ള ഇ-വിസ സേവനങ്ങള്‍ പുനരാരംഭിച്ച് ഭാരതം. ഖലിസ്ഥാനി ഭീകരൻ ഹർദീപ് സിംഗ് നിജ്ജാറിനെ വധിച്ചതുമായി ബന്ധപ്പെട്ട് ഭാരത-കാനഡ നയതന്ത്ര ബന്ധത്തിൽ വിള്ളൽ വീണിരുന്നു. തുടർന്ന് വിസ അനുവദിക്കുന്നത് ഭാരതം നിർത്തിവയ്‌ക്കുകയും ചെയ്തിരുന്നു.
എന്‍ട്രി വിസ, ബിസിനസ് വിസ, മെഡിക്കല്‍ വിസ, കോണ്‍ഫറന്‍സ് വിസ എന്നിങ്ങനെയുള്ള നാല് വിഭാഗങ്ങളിലെ വിസാ സേവനങ്ങളാണ് പുനരാരംഭിച്ചത്. ഭാരതത്തിന്റെ തീരുമാനത്തെ സ്വാഗതം ചെയ്യുന്നതായി കാനഡ അറിയിച്ചു. വിസ സേവനങ്ങള്‍ വീണ്ടും ആരംഭിക്കുന്നതോടെ ഇരുരാജ്യങ്ങള്‍ക്കുമിടയിലെ നയതന്ത്ര പ്രശ്നങ്ങള്‍ക്ക് പരിഹാരമുണ്ടായേക്കുമെന്നാണ് സൂചന.
കാനഡയില്‍ വെച്ച് ഖാലിസ്ഥാനി ഭീകരന്‍ ഹര്‍ദീപ് സിംഗ് നിജ്ജാറിനെ കൊലപ്പെടുത്തിയതില്‍ ഇന്ത്യക്ക് പങ്കുണ്ടെന്ന പ്രധാനമന്ത്രി ജസ്റ്റിന്‍ ട്രൂഡോയുടെ ആരോപണത്തെത്തുടര്‍ന്നാണ് ഇരു രാജ്യങ്ങളും തമ്മിലുള്ള ബന്ധം വഷളായത്. എന്നാല്‍ ഇത് ഇതുവരെ തെളിയിക്കാന്‍ കാനഡയ്‌ക്ക് കഴിഞ്ഞിട്ടില്ല. ഈ ആരോപണങ്ങളെ അസംബന്ധവും രാഷ്‌ട്രീയ പ്രേരിതവുമാണെന്ന് വിശേഷിപ്പിച്ച് ഭാരതം തള്ളിക്കളയുകയും ചെയ്തിരുന്നു. സ്വന്തം രാജ്യത്ത് നിന്ന് ഉൾപ്പെടെ വലിയ വിമർശനമാണ് ട്രൂഡോയ്‌ക്ക് ഈ സംഭവത്തെ തുടർന്ന് ഏറ്റുവാങ്ങേണ്ടി വന്നത്.
വിയന്ന കണ്‍വെന്‍ഷന്‍ പ്രകാരം ഇന്ത്യന്‍ നയതന്ത്ര ഉദ്യോഗസ്ഥര്‍ക്ക് കാനഡയില്‍ സുരക്ഷ നല്‍കിയാല്‍, വിസ അനുവദിക്കുന്നത് പുനരാരംഭിക്കാന്‍ തയ്യാറാണെന്ന് വിദേശകാര്യ മന്ത്രി എസ് ജയശങ്കര്‍ നേരത്തെ വ്യക്തമാക്കിയിരുന്നു. കാനഡയിലെ പൗരന്മാര്‍ക്ക് വിസ അനുവദിക്കുന്നത് ഭാരതം നിര്‍ത്തിവെച്ചത് ജോലിക്ക് പോകുന്ന നയതന്ത്ര ഉദ്യോഗസ്ഥര്‍ സുരക്ഷിതരല്ലാത്തതിനാലാണെന്നും ജയശങ്കര്‍ കൂട്ടിച്ചേര്‍ത്തു.
ഈ വർഷം ജൂണിലാണ് ഒരു ഗുരുദ്വാരയ്‌ക്ക് മുന്നിൽ വെച്ച് 45കാരനായ ഹർദീപ് സിംഗ് നിജ്ജാർ കൊല്ലപ്പെട്ടത്. കാറിൽ വിശ്രമിക്കുകയായിരുന്ന നിജ്ജാറിനെ ബൈക്കിലെത്തിയ രണ്ടംഗ സംഘം വെടിവെച്ച് കൊലപ്പെടുത്തുകയായിരുന്നു. ഇന്ത്യയിൽ നിന്ന് കുടുംബസമേതം കാനഡയിലേക്ക് കുടിയേറിയ വ്യക്തിയാണ് നിജ്ജാർ. 2020ൽ ഭാരതം ഇയാളെ ഭീകരനായി പ്രഖ്യാപിക്കുകയായിരുന്നു.
പ്രതികരിക്കാൻ ഇവിടെ എഴുതുക: