ന്യൂദല്ഹി : വിദേശ ഫണ്ട് നിയമങ്ങള് ലംഘിച്ചതിന് 9,000 കോടി രൂപ പിഴ ഒടുക്കണമെന്നാവശ്യപ്പെട്ട് എന്ഫോഴ്സ്മെന്റ് ഡയറക്ടറേറ്റ് (ഇഡി) എഡ്ടെക് രംഗത്തെ പ്രമുഖ കമ്പനി ബൈജൂസിന് നോട്ടീസ് അയച്ചതായി വാര്ത്ത. എന്നാല് തങ്ങള്ക്ക് നോട്ടീസ് ലഭിച്ചെന്ന വാര്ത്ത കമ്പനി നിഷേധിച്ചു.
2011 നും 2023 നും ഇടയില് ഏകദേശം 28,000 കോടി രൂപയുടെ നേരിട്ടുള്ള വിദേശ നിക്ഷേപം (എഫ്ഡിഐ) ബൈജൂസിന് ലഭിച്ചു.ഇതേ കാലയളവില് കമ്പനി വിദേശത്തേക്ക് ഏകദേശം 9,754 കോടി രൂപ വിദേശത്ത് നേരിട്ടുളള നിക്ഷേപം നടത്തിയതായി എന്ഫോഴ്സ്മന്റെ ഡയറക്ടറേറ്റ് അറിയിച്ചു.
ബൈജൂസ് വിദേശനാണയ വിനിമയ ചട്ടം ലംഘിച്ചിട്ടില്ലെന്ന് കമ്പനി എക്സ് പ്ലാറ്റ്ഫോമിലൂടെ അറിയിച്ചു.ബൈജൂസിന്റെ മാതൃസ്ഥാപനമായ തിങ്ക് ആന്ഡ് ലേണ് പ്രൈവറ്റ് ലിമിറ്റഡ് ബൈജു രവീന്ദ്രനും ഭാര്യ ദിവ്യ ഗോകുല്നാഥും ചേര്ന്ന് 2011-ലാണ് സ്ഥാപിച്ചത്. തുടക്കത്തില്, മത്സര പരീക്ഷകള്ക്കായി അവര് ഓണ്ലൈന് പഠനം ആണ് സംഘടിപ്പിച്ചത്.
2015-ല്, കമ്പനി ബൈജൂസ് ലേണിംഗ് ആപ്പ് പുറത്തിറക്കി, കുത്തനെയുള്ള വളര്ച്ചയാണ് തുടര്ന്നുണ്ടായത്. രണ്ട് വര്ഷത്തിന് ശേഷം, അവര് കുട്ടികള്ക്കായി ഒരു ഗണിത ആപ്ലിക്കേഷനും കുട്ടികളുടെ പഠന പുരോഗതി മനസിലാക്കാന് മാതാപിതാക്കളെ സഹായിക്കുന്നതിന് മറ്റൊരു ആപ്പും പുറത്തിറക്കി.2018 ആയപ്പോഴേക്കും ബൈജൂസിന് 1.5 കോടി ഉപയോക്താക്കളുണ്ടായിരുന്നു. കോവിഡ് 19 മഹാമാരി വേളയില് സ്കൂളുകള് അടച്ചിടുകയും കുട്ടികള് ഡിജിറ്റല് വിദ്യാഭ്യാസ രീതിയിലേക്ക് മാറുകയും ചെയ്തപ്പോള് ആപ്പിന്റെ ജനപ്രീതി വലിയതോതില് വര്ധിച്ചു.
