മുംബൈ: ഓണ്‍ലൈനില്‍ 300 രൂപയുടെ ലിപ്സ്റ്റിക് ഓര്‍ഡര്‍ ചെയ്ത വനിതാ ഡോക്ടര്‍ക്ക് സൈബര്‍ തട്ടിപ്പിലൂടെ നഷ്ടമായത് ഒരുലക്ഷം രൂപ. നവിമുംബൈയിലെ വനിതാ ഡോക്ടറാണ് തട്ടിപ്പിനിരയായത്.
നവംബര്‍ രണ്ടിനാണ് ഒരു ഇ-കൊമേഴ്സ് വെബ്സൈറ്റില്‍ ലിപ്സ്റ്റിക് ഓര്‍ഡര്‍ ചെയ്തത്. ഏതാനും ദിവസങ്ങള്‍ക്ക് ശേഷം കൊറിയര്‍ കമ്പനിയുടേതെന്ന പേരില്‍ ഡെലിവറി ചെയ്തതായുള്ള സന്ദേശം ലഭിച്ചു. എന്നാല്‍, സാധനം കിട്ടാതെ ഡെലിവറി ചെയ്തെന്ന സന്ദേശം ലഭിച്ചതോടെ വനിതാ ഡോക്ടര്‍ സന്ദേശത്തിലുണ്ടായിരുന്ന നമ്പറില്‍ വിളിച്ചു.
കമ്പനിയുടെ കസ്റ്റമര്‍കെയര്‍ എക്സിക്യൂട്ടിവ് തിരികെ വിളിക്കുമെന്നായിരുന്നു മറുപടി. പിന്നാലെ കസ്റ്റമര്‍കെയര്‍ എക്സിക്യൂട്ടിവെന്ന പേരില്‍ ഒരാള്‍ വിളിച്ചു. ഓര്‍ഡര്‍ പിടിച്ചുവെച്ചിരിക്കുകയാണെന്നും രണ്ടു രൂപ കൂടി അടയ്‌ക്കണമെന്നുമായിരുന്നു ഇയാളുടെ നിര്‍ദേശം. ഇതിനായി ബാങ്ക് വിവരങ്ങള്‍ കൈമാറാനായി ഒരു ലിങ്കും അയച്ചുനല്കി.
ഈ ലിങ്കില്‍ ക്ലിക്ക് ചെയ്തതോടെ മൊബൈലില്‍ ഒരു ആപ്ലിക്കേഷന്‍ ഡൗണ്‍ലോഡായെന്നാണ് പരാതിക്കാരി പറയുന്നത്. പിന്നീട് നവംബര്‍ ഒന്‍പതിനാണ് ബാങ്ക് അക്കൗണ്ടില്‍നിന്ന് പണം പിന്‍വലിച്ചതായുള്ള സന്ദേശം ലഭിച്ചത്. ഒരുതവണ 95,000 രൂപയയും പിന്നാലെ 5000 രൂപയുമാണ് പിന്‍വലിച്ചത്. പോലീസ് അന്വേഷണം ആരംഭിച്ചു
പ്രതികരിക്കാൻ ഇവിടെ എഴുതുക: