തിരുവനന്തപുരം: പാലക്കാട് മെഡിക്കല്‍ കോളജില്‍ ബിഎസ്‌സി നഴ്‌സിങ് പ്രവേശനത്തിന് പട്ടികജാതി സംവരണം അട്ടിമറിച്ച സംഭവത്തില്‍ ദേശീയ പട്ടികജാതി കമ്മിഷന് സംസ്ഥാന പട്ടികജാതി വികസന വകുപ്പ് ഡയറക്ടറോട് വിശദീകരണം തേടി.
ഡിസംബര്‍ പത്തിനുള്ളില്‍ ഇത് സംബന്ധിച്ചു മുഴുവന്‍ രേഖകള്‍ അടങ്ങുന്ന റിപ്പോര്‍ട്ട് ഹാജരാക്കാനാണ് നിര്‍ദേശം. ബിജെപി പട്ടികജാതി മോര്‍ച്ച സംസ്ഥാന അധ്യക്ഷന്‍ ഷാജുമോന്‍ വട്ടേക്കാട് ദേശീയ പട്ടികജാതി കമ്മിഷന് നല്കിയ പരാതിയിലാണ് നടപടി.
പട്ടികജാതി വികസന ഫണ്ട് ഉപയോഗിച്ച് നിര്‍മിച്ച പാലക്കാട് മെഡിക്കല്‍ കോളജില്‍ സര്‍ക്കാര്‍ നേരിട്ട് ആരോഗ്യ വകുപ്പിന്റെ കീഴില്‍ ഗവണ്‍മെന്റ് നഴ്‌സിങ് കോളജ് ആരംഭിക്കാനുള്ള നീക്കം നിലവിലെ പട്ടികജാതി സംവരണം അട്ടിമറിക്കുമെന്നാണ് പട്ടികജാതി മോര്‍ച്ച പരാതി നല്കിയത്.
പാലക്കാട് മെഡിക്കല്‍ കോളജില്‍ നിലവില്‍ പട്ടികജാതി വിഭാഗത്തിന് 70 ശതമാനവും പട്ടിക വര്‍ഗ വിഭാഗത്തിന് രണ്ടു ശതമാനവുമാണ് സംവരണമുള്ളത്. ഇവിടെ ആരോഗ്യ വകുപ്പിന്റെ കീഴില്‍ നഴ്‌സിങ് കോളജ് നടത്തുന്നതോടെ നിലവിലെ പട്ടികജാതി സംവരണം അട്ടിമറിക്കപ്പെടും. 72 ശതമാനം സംവരണം ലഭിച്ചിടത്തു 10 ശതമാനം സംവരണം മാത്രമായിരിക്കും ലഭിക്കുക.
ഈ നടപടി തുടര്‍ന്നാല്‍ ഭാവിയില്‍ എംബിബിസ് ബാച്ചിന്റെ നിലവിലെ പട്ടികജാതി സംവരണവും അട്ടിമറിക്കപ്പെടും. നഴ്‌സിങ് കോളജ് പട്ടികജാതി വികസന വകുപ്പിന് കീഴിലാക്കാന്‍ സര്‍ക്കാര്‍ തയാറാകണമെന്നും ഷാജുമോന്‍ വട്ടേക്കാട് ദേശീയ പട്ടികജാതി കമ്മിഷന് നല്കിയ പരാതിയില്‍ ആവശ്യപ്പെട്ടിട്ടുണ്ട്.
പ്രതികരിക്കാൻ ഇവിടെ എഴുതുക: