ആലുവ : അന്യ സംസ്ഥാന തൊഴിലാളിയുടെ അഞ്ച് വയസുകാരി മകളെ പീഡിപ്പിച്ച് കൊലപ്പെടുത്തിയ കേസില്‍ കുട്ടിയുടെ കുടുംബത്തില്‍ നിന്ന് ഭര്‍ത്താവ് പണം തട്ടിയതിന് മഹിളാ കോണ്‍ഗ്രസ് നേതാവിനെ സസ്പന്‍ഡ് ചെയ്തു. മഹിളാ കോണ്‍ഗ്രസ് ജില്ലാ സെക്രട്ടറി ഹസീന മുനീറിനെയാണ് അന്വേഷണ വിധേയമായി സസ്പന്‍ഡ് ചെയ്തത്. സഹായ വാഗ്ദാനം നല്‍കി കുട്ടിയുടെ കുടുംബത്തില്‍ നിന്ന് പണം തട്ടിയെന്ന് പരാതി ഉയര്‍ന്നിരുന്നു.
അസഫാക്ക് ആലം പീഡിപ്പിച്ച് കൊലപ്പെടുത്തിയ ആലുവയിലെ അഞ്ച് വയസുകാരിയുടെ വീട്ടുകാരെയാണ് ഹസീന മുനീറിന്റെ ഭര്‍ത്താവ് മുനീര്‍ കബളിപ്പിച്ചത്.ഹസീന നല്കിയ മറുപടി തൃപ്തികരമല്ലെന്ന് വിലയിരുത്തി എറണാകുളം മഹിളാ കോണ്‍ഗ്രസ് ജില്ലാ കമ്മിറ്റിയാണ് തീരുമാനമെടുത്തത്.
പരാതി ഉയര്‍ന്നപ്പോള്‍ തട്ടിയെടുത്ത പണം കുടുംബത്തിന് തിരികെ നല്‍കി മുനീര്‍ പരാതി പരിഹരിച്ചിരുന്നു. ബാക്കി നല്‍കാനുണ്ടായിരുന്ന 50,000 രൂപ കൂടി നല്‍കിയതോടെ ഇനി പരാതിയില്ലെന്ന് കുടുംബം അറിയിച്ചു.
മുനീര്‍ 1.20ലക്ഷം രൂപ തട്ടിയെടുത്തുവെന്നായിരുന്നു പരാതി. പരാതിപ്പെടുമെന്ന് പറഞ്ഞപ്പോള്‍ ഇതില്‍ 70,000 രൂപ തിരിച്ചു നല്‍കിയെന്നും ബാക്കി തുക നല്‍കിയില്ലെന്നും കുട്ടിയുടെ പിതാവ് പറഞ്ഞു. എന്നാല്‍ താനും ഭര്‍ത്താവും അവരില്‍നിന്ന് പണം കൈപ്പറ്റിയിട്ടില്ലെന്നും എന്തടിസ്ഥാനത്തിലാണ് ആരോപണം എന്നറിയില്ലെന്നുമാണ് ഹസീനയുടെ പക്ഷം.
കുട്ടി കൊല്ലപ്പെട്ട വേളയില്‍ കുടുംബത്തെ സഹായിക്കാന്‍ മുന്നില്‍ നിന്നത് മുനീറായിരുന്നു.സഹായിക്കാമെന്ന് പറഞ്ഞ് കുട്ടിയുടെ പിതാവിന്റെ അക്കൗണ്ടില്‍ നിന്ന് എടിഎം കാര്‍ഡ് ഉപയോഗിച്ച് മുനീര്‍ പണമെടുത്തിരുന്നു. അന്ന് പലപ്പോഴായി 1.2 ലക്ഷം രൂപയോളം പിന്‍വലിച്ചിരുന്നുവെന്നും ഇതില്‍ കുറച്ച് മാത്രമാണ് തങ്ങള്‍ക്ക് തന്നതെന്നും കുട്ടിയുടെ പിതാവ് വെളിപ്പെടുത്തി.
വാര്‍ത്ത പുറത്തു വന്നതോടെ കളവാണ് പ്രചരിക്കുന്നത് പറയണമെന്ന് കുട്ടിയുടെ പിതാവിനോട് മുനാര്‍ ആവശ്യപ്പെട്ടു. എന്നാല്‍, അതിന് വഴങ്ങാതെ വന്നതോടെ ബാക്കി പണം കൂടി തിരിച്ച് നല്‍കി.
പ്രതികരിക്കാൻ ഇവിടെ എഴുതുക: