കൊച്ചി : ടൈറ്റാനിയം അഴിമതി കേസില്‍ സിബിഐ അന്വേഷണത്തിന് ഉത്തരവിട്ട് കേരള ഹൈക്കോടതി. മുന്‍ ജീവനക്കാരന്‍ ജയന്‍ നല്‍കിയ ഹര്‍ജിയില്‍ ആണ് ജസ്റ്റിസ് കെ ബാബുവിന്റെ ഉത്തരവ്. കേസ് സിബിഐക്ക് വിടാന്‍ വിജിലന്‍സ് ശുപാര്‍ശ നല്‍കിയിരുന്നതാണ്.
അന്തരിച്ച മുന്‍ മുഖ്യമന്ത്രി ഉമ്മന്‍ചാണ്ടി സര്‍ക്കാരിന്റെ കാലത്ത് 120 കോടിയോളം രൂപയുടെ അഴിമതി നടന്നുവെന്നാണ് പരാതിക്കാരന്റെ ഹര്‍ജിയില്‍ ആരോപിക്കുന്നത്. ടൈറ്റാനിയം കമ്പനിയില്‍ മാലിന്യ സംസ്‌കരണ പ്ലാന്റ് സ്ഥാപിക്കുന്നതിനായി ഫിന്‍ലാന്‍ഡ് ആസ്ഥാനമായി പ്രവര്‍ത്തിക്കുന്ന കമ്പനിയുമായി അന്നത്തെ സര്‍ക്കാര്‍ കരാറില്‍ എത്തിയിരുന്നു. 256 കോടിയുടെ ഉപകരണങ്ങള്‍ എത്തിക്കാനായിരുന്നു തീരുമാനം. എന്നാല്‍ പ്ലാന്റ് സ്ഥാപിക്കാനായി ഇറക്കുമതി ചെയ്ത ഒരു ഉപകരണം പോലും സ്ഥാപിച്ചില്ല. ഇതിനായി ഏകദേശം 86 കോടിയോളം രൂപയുടെ അഴിമതി നടന്നിട്ടുണ്ടെന്നാണ് വിജിലന്‍സ് അന്വേഷണത്തില്‍ കണ്ടെത്തിയത്.
ഉമ്മന്‍ചാണ്ടി മുഖ്യമന്ത്രിയും, വി.കെ ഇബ്രാഹിംകുഞ്ഞ് വ്യവസായമന്ത്രിയും ആയിരിക്കെയാണ് ഈ സംഭവങ്ങള്‍ രമേശ് ചെന്നിത്തല അടക്കമുള്ള കോണ്‍ഗ്രസ് നേതാക്കളും കേസില്‍ അന്വേഷണം നേരിടുന്നുണ്ട്.
അഴിമതി പുറത്തുവന്നതിന് പിന്നാലെ സംസ്ഥാന സര്‍ക്കാര്‍ സിബിഐ അന്വേഷണത്തിന് നിര്‍ദ്ദേശിച്ചെങ്കിലും കേസ് ഏറ്റെടുക്കാന്‍ സിബിഐ താല്‍പര്യം കാണിച്ചിരുന്നില്ല. ഇതിനെ തുടര്‍ന്നാണ് മുന്‍ ജീവനക്കാരന്‍ ഹൈക്കോടതിയെ സമീപിക്കുന്നത്.
പ്രതികരിക്കാൻ ഇവിടെ എഴുതുക: