ഇരുചക്ര വാഹനം  അയപ്പഭക്തരുടെ വാഹനത്തിൽ ഇടിച്ചു; പിന്നാലെ റോഡിലൂടെ ഒഴുകിയത് 67 കുപ്പി മദ്യം! നാസറുദ്ദീൻ അറസ്റ്റിൽ 

തിരുവനന്തപുരം: ഇരുചക്ര വാഹനത്തിൽ  മദ്യം കടത്തിയാൾ പിടിയിൽ. ആറ്റിങ്ങൽ ആയിലം സ്വദേശി നാസറുദീൻ (50) ആണ് അറസ്റ്റിലായത്. ഇയാളിൽ നിന്ന് മൂന്ന് സഞ്ചികളിലായി 67 കുപ്പി മദ്യം കണ്ടെടുത്തു.

കഴിഞ്ഞ ദിവസമാണ് സംഭവം. അയ്യപ്പഭക്തർ സഞ്ചരിച്ചിരുന്ന കാർ റോഡരികിൽ നിറുത്തി വിശ്രമിക്കുന്നതിനിടെ ചടയമംഗലത്ത് നിന്നും കിളിമാനൂരിലേക്ക് വരികയായിരുന്ന ഇരുചക്ര വാഹനം കാറിന് പിറകിൽ ഇടിക്കുകയായിരുന്നു. ഇടിയുടെ ആഘാതത്തിൽ ഇരുചക്ര വാഹനത്തിൽ നിന്നും മദ്യകുപ്പി റോഡിലേക്ക് വീണു. കാർ യാത്രികർ പ്രതിയെ തടഞ്ഞുവച്ച് പോലീസിനെ വിവരമറിയിക്കുകയായിരുന്നു.

തുടർന്ന് പോലീസ് നടത്തിയ പരിശോധനയിലാണ് അനധികൃതമായി കടത്തിയ 35 ലിറ്ററോളം മദ്യം പിടിച്ചെടുത്തത്. മൂന്ന് സഞ്ചികളിലായി ഒളിപ്പിച്ച 67 കുപ്പി മദ്യമാണ് കടത്തിയത്. പ്രതി ആറ്റിങ്ങൽ പോലീസ് സ്റ്റേഷനിലെ ഗുണ്ടാ ലിസ്റ്റിൽ ഉൾപ്പെട്ടിട്ടുള്ള ആളും നിരവധി അബ്കാരി, മോഷണ കേസുകളിൽ പ്രതിയുമാണ്.