ട്രിച്ചി: കാമുകന്റെ സഹായത്തോടെ ഭര്ത്താവിനെ കൊലപ്പെടുത്തി മൃതദേഹം കഷണങ്ങളാക്കിയ ഭാര്യയും കാമുകനും അറസ്റ്റിലായി.തമിഴ്നാട്ടിലെ ട്രിച്ചിയിലാണ് സംഭവം. 26വയസുളള വിനോദിനിയാണ് 23 കാരനായ കാമുകന് ഭാരതിയെ കൂട്ടുപിടിച്ച് ഭര്ത്താവ് പ്രഭുവിനെ കൊല ചെയ്തത്. സംഭവത്തില് മറ്റ് മൂന്ന് പേരെ കൂടി പൊലീസ് അറസ്റ്റ് ചെയ്തു
പുഷ്പ വ്യാപാരിയായ പ്രഭുവിനെ അന്വേഷിച്ച് സഹോദരന് വീട്ടിലെത്തിയതോടെയാണ് സംഭവം വെളിച്ചത്തായത്. സഹോദരന് എവിടെ എന്ന് ചോദിച്ചപ്പോള് തിരിച്ചെത്തിയില്ലെന്ന് വിനോദിനി മറുപടി നല്കിയെങ്കിലും സംശയം തോന്നിയ സഹോദരന് അന്വേഷണത്തിനിറങ്ങി. എന്നാല് കണ്ടെത്താനായില്ല.
തുടര്ന്ന് സമയപുരം പൊലീസില് പരാതി നല്കി. പൊലീസ് അന്വേഷണത്തിലാണ് വിനോദിനിക്ക് ഭാരതിയുമായുള്ള ബന്ധവും വ്യക്തമായത്. വിനോദിനിയും കാമുകനും മൂന്ന് മാസം മുമ്പ് സന്ധ്യ ഗേറ്റിന് സമീപം മറ്റൊരു വീട് വാടകയ്ക്കെടുത്തിരുന്നു. ഇത് പ്രഭു കണ്ടെത്തിയതാണ് കൊലപാതകത്തിലേക്ക് നയിച്ചത്.
വിവാഹേതര ബന്ധത്തെ ചൊല്ലിയുളള വഴക്കിനെ തുടര്ന്ന് പ്രഭുവിന് അയാളറിയാതെ വിനോദിനി ഉറക്കഗുളിക നല്കി. പിന്നീട് ഭാരതിയും വിനോദിനിയും ചേര്ന്ന് പ്രഭുവിനെ കഴുത്ത് ഞെരിച്ച് കൊല്ലുകയായിരുന്നു.
പിന്നീട് ഭാരതി തന്റെ സുഹൃത്തുക്കളായ റൂബന് ബാബു, ദിവാകര്, ശര്വാന് എന്നിവരുമായി ചേര്ന്ന് പ്രഭുവിന്റെ മൃതദേഹം രണ്ട് കഷണങ്ങളാക്കിയ ശേഷം കാവേരി നദിയിലും, കൊല്ലിഡാം നദിയിലും ഉപേക്ഷിക്കുകയായിരുന്നുവെന്ന് പൊലീസ് പറഞ്ഞു. അഞ്ച് പ്രതികളെയും പൊലീസ് പിടികൂടി.
