തിരുവനന്തപുരം: മോഷണക്കേസ് പ്രതികളുടെ വാര്‍ത്ത സാമൂഹ്യമാധ്യമത്തില്‍ പങ്കുവച്ച അയല്‍വാസിയെ നിരവധി കേസിലെ പ്രതി വീടുകയറി ആക്രമിച്ചു. മലയിന്‍കീഴ് അണപ്പാട് കുഴുമത്ത് അരുണ്‍ നിവാസില്‍ അരുണ്‍ കുമാറി(38)നെയാണ് അയല്‍വാസിയും സ്ഥിരം കുറ്റവാളിയുമായ മലയിന്‍കീഴ് മണപ്പുറം വൃന്ദാവനത്തില്‍ തക്കുടു എന്ന അഭിഷേക് ആക്രമിച്ചത്.
തലയിലും മുതുകിലും കൈയ്‌ക്കും വെട്ടേറ്റ അരുണ്‍കുമാറിനെ പോലീസ് എത്തിയാണ് ആശുപത്രിയില്‍ പ്രവേശിപ്പിച്ചത്. അരുണ്‍കുമാറിന്റെ വീട്ടില്‍ ബഹളം കേട്ട് ഓടിയെത്തിയ സുഹൃത്ത് ശ്രീനാഥ് (42) നും തോളില്‍ പരിക്കേറ്റു. നിരവധി കേസുകളില്‍ ഉള്‍പ്പെട്ട അഭിഷേകിനെ മാലപിടിച്ചുപറി കേസില്‍ അറസ്റ്റ് ചെയ്തിരുന്നു. പ്രതികളെ കോടതി റിമാന്‍ഡ് ചെയ്ത വാര്‍ത്ത പത്രങ്ങളില്‍ വരികയും ചെയ്തു. ഇത് അരുണ്‍കുമാര്‍ തന്റെ ഫേസ്ബുക്കില്‍ പോസ്റ്റ് ചെയ്തിരുന്നു.
ഇതേതുടര്‍ന്ന് ജയില്‍ നിന്ന് ഇറങ്ങിയ പ്രതി യുവാവിനെ വകവരുത്തുമെന്ന് ഭീഷണിപ്പെടുത്തിയിരുന്നു. മൂന്ന് മാസം മുമ്പ് ജാമ്യം ലഭിച്ച് പുറത്തിറങ്ങിയ പ്രതി കഴിഞ്ഞ ദിവസം രാത്രി അരുണിന്റെ വീട്ടില്‍ അതിക്രമിച്ച് കയറി അമ്മയുടെയും ഭാര്യയുടെയും മുന്നിലിട്ട് വെട്ടുകയായിരുന്നു. പരാതിയുടെ അടിസ്ഥാനത്തില്‍ പോലിസ് കേസെടുത്ത് അന്വേഷണം ആരംഭിച്ചു. പ്രതി അഭിഷേക് ഒളിവിലാണ്.
പ്രതികരിക്കാൻ ഇവിടെ എഴുതുക: