തിരുവനന്തപുരം: കേരള ഗവര്‍ണര്‍ ആരിഫ് മുഹമ്മദ് ഖാനെതിരെ സംസ്ഥാന സര്‍ക്കാര്‍ സുപ്രീം കോടതിയെ സമീപിച്ച നടപടിയെ രൂക്ഷമായി വിമര്‍ശിച്ച് കേന്ദ്രമന്ത്രി വി. മുരളീധരന്‍.
ലോകായുക്തയുടെ അധികാരം വെട്ടിക്കുറയ്‌ക്കുന്ന ബില്‍, സര്‍വകലാശാലയുടെ അധികാരങ്ങളില്‍ കൈകടത്തുന്ന ബില്‍ എന്നിങ്ങനെയുള്ള ബില്ലുകളില്‍ ഒപ്പുവയ്‌ക്കാത്തത് ഗവര്‍ണറുടെ നിലപാടാണെന്ന് കേന്ദ്രമന്ത്രി തിരുവനന്തപുരത്ത്
പറഞ്ഞു.
ബന്ധു നിയമനവും സ്വജനപക്ഷപാതവും നിര്‍ബാധം നടത്താന്‍ പറ്റുന്ന സാഹചര്യം സൃഷ്ടിക്കുകയാണ് സംസ്ഥാന സര്‍ക്കാരിന്റെ ലക്ഷ്യം. എന്നാല്‍ കേരളത്തിലെ ജനങ്ങളുടെ താല്‍പര്യം സംരക്ഷിക്കാനാണ് ആരിഫ് മുഹമ്മദ് ഖാന്‍ ശ്രമിക്കുന്നത്. ഭരണഘടനാപരമായി ഗവര്‍ണര്‍ക്ക് എതിരെ സര്‍ക്കാരിന് ഈ വിഷയത്തില്‍ ഒന്നും ചെയ്യാന്‍ ആകില്ലെന്നും വി.മുരളീധരന്‍ പ്രതികരിച്ചു.
എല്‍ഡിഎഫ് സര്‍ക്കാര്‍ പലവിഷയങ്ങളിലും സുപ്രീംകോടതിയില്‍ പോയി കോടികള്‍ ചിലവഴിക്കുന്നത് പല തവണ കണ്ടതാണ്. ജനത്തിന്റെ നികുതി പണം ധൂര്‍ത്ത് അടിക്കുക മാത്രമാണ് സര്‍ക്കാര്‍ ചെയ്യുന്നതെന്നും കേന്ദ്രമന്ത്രി കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: