കണ്ണൂര്: ബാങ്ക് ജീവനക്കാരി ആണെന്ന വ്യാജേന യുവാവിനെ വിളിച്ച് അക്കൗണ്ടില് നിന്ന് തട്ടിയെടുത്തത് 2,70,000 രൂപ. കണ്ണൂര് ടൗണ് പോലീസ് സ്റ്റേഷനില് ലഭിച്ച പരാതിയില് കേസ് രജിസ്റ്റര് ചെയ്ത് അന്വേഷണം ആരംഭിച്ചു. രൂപാലി എന്ന് സ്വയം പരിചയപ്പെടുത്തിയ സ്ത്രീ യുവാവിന്റെ നമ്പറിലേക്ക് ക്രെഡിറ്റ് കാര്ഡ് ഉപയോഗിക്കുന്നതിനെ കുറിച്ച് അന്വേഷിക്കാന് കഴിഞ്ഞ മെയ് 26 നാണ് വിളിച്ചത്.
യുവാവിന് ഇന്ത്യന് ഓയില് ക്രെഡിറ്റ്കാര്ഡ് ഉണ്ടെന്നും അത് ഉപയോഗിക്കുന്നില്ലെന്നും ക്യാന്സല് ചെയ്യണമെന്നും അവരോട് പറഞ്ഞപ്പോള് അവര് നിര്ദ്ദേശിച്ചപ്രകാരം യുവാവിന്റെ ഫോണിലേക്ക് വന്ന ഒരു ഒടിപി അവര്ക്ക് പറഞ്ഞുകൊടുത്തു. തുടര്ന്നാണ് യുവാവിന് അക്കൗണ്ടില് നിന്ന് പണം നഷ്ടമായത്. അതിനുശേഷം ആ സ്ത്രീ വീണ്ടും വിളിക്കുകയും നഷ്ടപ്പെട്ട തുക ക്ലീയര് ചെയ്യുവാന് ഒടിപി പറഞ്ഞു കൊടുക്കാന് നിര്ദ്ദേശിച്ചതുപ്രകാരം യുവാവ് ഒടിപി പറഞ്ഞു കൊടുത്തു. പിന്നീട് അക്കൗണ്ടിലേക്ക് നഷ്ടപ്പെട്ട തുകയേക്കാള് കൂടുതല് തുക ക്രെഡിറ്റ് ആയി.
തുക ക്രെഡിറ്റായ കാര്യം അവരോട് പറഞ്ഞപ്പോള് അത് ഭാവിയില് ഉപയോഗിക്കാനാണ് എന്ന് പറയുകയും ആ തുക ഇപ്പോള് വേണ്ടെന്ന് പറഞ്ഞപ്പോള് അത് ക്ലീയര് ചെയ്യാന് അടുത്ത ഒരു ഒടിപി കൂടി ആവശ്യപ്പെടുകയായിരുന്നു. തുടര്ന്നാണ് 2,70,000 രൂപ നഷ്ടമായത്. പിന്നീട് യുവാവ് സ്റ്റേഷനിലെത്തി പരാതി നല്കുകയായിരുന്നു.
വേണം ജാഗ്രത…
വാട്ട്സ്ആപ്പ് ടെലിഗ്രാം തുടങ്ങിയ മാധ്യമങ്ങള് ഉപയോഗിക്കുന്നവര് ഇത്തരം സൈബര് കുറ്റകൃത്യങ്ങളെ കുറിച്ച് ജാഗ്രത പുലര്ത്തേണ്ടതും സൈബര് കുറ്റകൃത്യങ്ങള് വര്ദ്ധിച്ച് വരുന്ന ഈ കാലത്ത് പരിചയമല്ലാത്ത ഫോണ് നമ്പറുകളില് നിന്ന് വരുന്ന ഇതു പോലുള്ള മെസ്സേജുകളോ കോളുകളോ ലഭിച്ചാല് തിരിച്ച് മെസ്സേജ് അയക്കുകയോ അതിനെ പറ്റി ചോദിക്കുകയോ ചെയ്യരുത്. സൈബര് കുറ്റകൃത്യങ്ങള്ക്ക് ഇരയാകുകയാണെങ്കില് ഉടന് 1930 എന്ന പോലീസ് സൈബര് ഹെല്പ്പ്ലൈനില് ബന്ധപ്പെടുക. അല്ലെങ്കില് ംംം.ര്യയലൃരൃശാല.ഴീ്.ശി എന്ന വെബ്സൈറ്റ് സന്ദര്ശിച്ച് നിങ്ങളുടെ പരാതി റിപ്പോര്ട്ട് ചെയ്യുക.
പാര്ട്ട് ടൈം ജോലി…നഷ്ടമായത് 1,10,518 രൂപ
ഓണ്ലൈന്നായി പാര്ട്ട് ടൈം ജോലി വാഗ്ദാനം ചെയ്ത് കണ്ണൂര് പയ്യാമ്പലം സ്വദേശിയായ യുവാവിന് നഷ്ടമായത് 1,10,518 രൂപ. കണ്ണൂര് ടൗണ് പോലീസ് സ്റ്റേഷനില് ലഭിച്ച പരാതിയില് കേസ് രജിസ്റ്റര് ചെയ്തു. സമാനമായ തട്ടിപ്പില് ധര്മ്മടം സ്വദേശിയായ യുവാവിന് 14000 രൂപ നഷ്ടമായി.
മോഹവാഗ്ദാനങ്ങള് നല്കി പലതവണകളായി ഓരോ ടാസ്ക് നല്കിയാണ് തട്ടിപ്പിനിരയാക്കുന്നത്. ടാസ്ക് ചെയ്യുന്നതിനായി നിശ്ചിത പണം നല്കിയാല് ടാസ്ക് പൂര്ത്തീകരിച്ചതിന് ശേഷം പണം ലാഭത്തോടെ തിരിച്ചു നല്കും എന്ന് വാഗ്ദാനം നല്കി വിശ്വസിപ്പിക്കും. താല്പര്യം അറിയിച്ചാല് അതിനോട് അനുബന്ധിച്ച ലിങ്കുകളും മറ്റും അയച്ചു നല്കി ടാസ്ക് ആരംഭിക്കാന് ആവശ്യപ്പെടും.
തുടക്കത്തില് ലാഭത്തോട് കൂടി പണം തിരികെ നല്കുമെങ്കിലും പിന്നീട് ടാസ്ക് ചെയ്യുന്നതിന് വേണ്ടി കൂടുതല് പണം ആവശ്യപ്പെടുകയും പണം തിരികെ നല്കാതിരിക്കുകയും ചെയ്യുന്നു. ഇതോടെയാണ് ഇതൊരു തട്ടിപ്പാണെന്ന് പലര്ക്കും മനസ്സിലാകുന്നത്. അപ്പോഴേക്കും ഒരു നല്ല തുക അക്കൗണ്ടില് നിന്നും നഷ്ടമായിട്ടുണ്ടാകും.
