മലപ്പുറം: ജമാഅത്ത് ഇസ്ലാമിയുടെ യുവജന സംഘടനയായ സോളിഡാരിറ്റി യൂത്ത് മൂവ്മെന്റിന്റെ നേതൃത്വത്തില് മലപ്പുറത്ത് വെള്ളിയാഴ്ച സംഘടിപ്പിച്ച പാലസ്തീന് അനുകൂല പരിപാടിയില് ഹമാസ് നേതാവ് ഖാലിദ് മിഷേല് പ്രസംഗിച്ചതില് കേസെടുക്കാന് വകുപ്പില്ലെന്ന നിലപാടിലാണ് കേരള പൊലീസ്.
പരിപാടിയില് ഓണ്ലൈനായാണ് ഖാലിദ് മിഷേല് സംസാരിച്ചത്. സംഘാടകര് തന്നെ ഈ വിഡിയോ പുറത്തുവിടുകയായിരുന്നു.
ഹമാസ് ഖത്തര് നേതാവ് ഖാലിദ് മിഷേലിന്റെ അറബിയിലുളള പ്രസംഗത്തിന്റെ മലയാളം പരിഭാഷ പരിശോധിച്ചാണ് പൊലീസ് കേസെടുക്കാനാവില്ലെന്ന നിഗമനത്തിലെത്തിയത്. ഹമാസിനെ ഭീകര സംഘടനയായി കേന്ദ്ര സര്ക്കാര് പ്രഖ്യാപിച്ചിട്ടില്ല. യുഎപിഎ ഷെഡ്യൂള് 1ലെ 42 ഭീകര സംഘടനകളില് ഹമാസ് ഉള്പ്പെടുന്നില്ല. ഹമാസിനെ ഭീകര സംഘടനയായി ഐക്യരാഷ്ട്ര സംഘടനയും പ്രഖ്യാപിച്ചിട്ടില്ല. ഖാലിദ് മിഷേലിന്റെ പ്രസംഗത്തില് ഇന്ത്യന് ശിക്ഷാനിയമം 153 പ്രകാരം രാജ്യദ്രോഹ പരാമര്ശം ഇല്ലെന്നാണ് പൊലീസിന് ലഭിച്ച നിയമോപദേശം.
അല് അഖ്സ നമ്മുടെ അഭിമാനവും ശ്രേഷ്ഠ സ്ഥലവുമാണ്. പ്രിയപ്പെട്ട പ്രവാചകന് മുഹമ്മദ് സ്വര്ഗ ലോകത്തേക്ക് മിഅ്റാജ് യാത്ര ആരംഭിച്ച ഇടമാണ്. ഗസയിലെ നിങ്ങളുടെ പ്രിയപ്പെട്ട സഹോദരന്മാര് കഴിഞ്ഞ ഒക്ടോബര് 7 മുതല് അഖ്സയ്ക്കായി പോരാടുകയാണ്. മൂന്നാഴ്ചകളായി സൈനിക രംഗത്ത് പരാജയപ്പെട്ട ശേഷം ഇന്ന് ഇസ്രായേല് നമ്മുടെ ഗസയിലെ നമ്മുടെ ജനങ്ങളോട് പ്രതികാരം ചെയ്യുകയാണ്. നമ്മുടെ വീടുകള് അവര് തകര്ക്കുന്നു. പോരാട്ട മുഖത്ത് ഇസ്ലാമിക സമൂഹം ഒന്നിച്ചുനിന്നില്ലെങ്കില് വലിയ പരീക്ഷണങ്ങള് ഉണ്ടാവും. നമ്മള് വിജയിക്കുക തന്നെ ചെയ്യുമെന്നാണ് ഖാലിദ് മിഷേല് അറബിയില് നടത്തിയ പ്രസംഗത്തിന്റെ മലയാളം പരിഭാഷ.
