പെരുമ്പാവൂരിൽ മൂന്ന് വയസുകാരി പീഡനത്തിനിരയായി

കൊച്ചി : പെരുമ്പാവൂരിൽ മൂന്ന് വയസുകാരിയെ അന്യസംസ്ഥാന തൊഴിലാളി പീഡനത്തിന് ഇരയാക്കി. പെരുമ്പാവൂർ കുറുപ്പംപടിയിലാണ് സംഭവം. ഉറങ്ങിക്കിടന്ന മൂന്ന് വയസുകാരിയെയാണ് പ്രതി ലൈംഗികാതിക്രമത്തിന് ഇരയാക്കിയത്. കുഞ്ഞിനെ ആശുപത്രിയിൽ പ്രവേശിപ്പിച്ചിരിക്കുകയാണ്.

ഇന്നലെ അർദ്ധ രാത്രിയോടെ തന്നെ കുഞ്ഞിന്റെ മാതാപിതാക്കളുടെ മൊഴി രേഖപ്പെടുത്തിയിരുന്നു. പ്രതികളെന്ന് സംശയിക്കുന്ന രണ്ട് പേരെ കസ്റ്റഡിയിലെടുക്കുകയും ചെയ്തു. ആക്രമണത്തിന് ഇരയായ കുട്ടിയും പ്രതികളും അസം സ്വദേശികളാണെന്നാണ് ലഭ്യമാകുന്ന വിവരം.

ചൈൽഡ് ലൈൻ അധികൃതർ ആശുപത്രിയിലെത്തി കുട്ടിയുടെ മൊഴി രേഖപ്പെടുത്തിയിട്ടുണ്ട്. കുഞ്ഞിന് ഗുരുതരമായ പരിക്കുകളില്ലെന്നാണ് പുറത്തു വരുന്ന വിവരം.