സംസ്ഥാന സ്‌കൂള്‍ കായികോത്സവം: മൂന്നാം സ്വര്‍ണം, പിന്നെ പൊന്നുമ്മ….

കുന്നംകുളം: സംസ്ഥാന സ്‌കൂള്‍ കായികമേളയില്‍ സബ്ജൂനിയര്‍ വിഭാഗത്തിലെ മിന്നും താരമായത് കണ്ണൂര്‍ ജിവിഎച്ച്എസ്എസിലെ ടി.വി. ദേവശ്രീ.

ഈ കായികമേളയില്‍ ഈ വിഭാഗത്തിലെ വ്യക്തിഗത ചാമ്പ്യനും ദേവശ്രീയാണ്. 100, 200, 80 മീറ്റര്‍ ഹര്‍ഡില്‍സ് എന്നിവയില്‍ പൊന്നണിഞ്ഞാണ് ദേവശ്രീ മീറ്റിന്റെ താരമായത്. ഇന്നലെ 200 മീറ്ററിലും വിജയിച്ചാണ് ദേവശ്രീ മൂന്നാം സ്വര്‍ണം സ്വന്തമാക്കിയത്. 200 മീറ്ററില്‍ ഫിനിഷ് ചെയ്തപ്പോള്‍ അമ്മ ഗീതയുടെ സ്‌നേഹചുംബനമായിരുന്നു ആദ്യ സമ്മാനം.

പയ്യന്നൂര്‍ കുഞ്ഞിമംഗലം ഏഴിലോട് പുളീക്കല്‍ വീട്ടില്‍ ഓട്ടോ ഡ്രൈവറായ ജനാര്‍ദ്ദനന്റെയും ഗീതയുടെയും മകളാണ് ഈ ഒന്‍പതാം ക്ലാസ്സുകാരി.