റോഡ് മുറിച്ചുകടക്കവെ കാർ ഇടിച്ച് വയോധികയ്‌ക്ക് ദാരുണാന്ത്യം; നാല് പേർക്ക് പരിക്ക്

കോഴിക്കോട്: കൊടുവള്ളി വാവാട് ദേശീയപാതയിൽ റോഡ് മുറിച്ചു കടക്കവെ വാഹനമിടിച്ച് വയോധികയ്‌ക്ക് ദാരുണാന്ത്യം. വാാവാട് കണ്ണിപ്പുറായിൽ മറിയ ആണ് മരിച്ചത്. അപകടത്തിൽ നാല് സ്ത്രീകൾക്ക് കൂടി പരിക്കേറ്റിട്ടുണ്ട്. ഇന്നലെ രാത്രി 8.45-ഓടെയായിരുന്നു സംഭവം. വാവാട് സിവിൽ സപ്ലൈസ് ഗോഡൗണിന് സമീപത്ത് കനത്ത മഴ തുടരുന്നതിനിടെയായിരുന്നു അപകടം.

വിവാഹചടങ്ങിൽ പങ്കെടുത്ത് മടങ്ങവെയായിരുന്നു സ്ത്രീകൾ അപകടത്തിൽപ്പെട്ടത്. റോഡ് മുറിച്ച് കടക്കാൻ ശ്രമിക്കവെ കോഴിക്കോട് ഭാഗത്ത് നിന്ന് വയനാട്ടിലേക്ക് പോകുകയായിരുന്ന കാർ ഇടിക്കുകയായിരുന്നു. അപകടത്തിൽ മരിച്ച മറിയയുടെ സഹോദരി വാവാട് കണ്ണിപ്പുറായിൽ സുഹറ, കുളങ്ങരകണ്ടിയിൽ മറിയം, പുൽക്കുഴിയിൽ ആമിന, കുളങ്ങരകണ്ടിയിൽ സുഹറയുടെ മകന്റെ ഭാര്യ എന്നിവർക്കാണ് പരിക്കേറ്റത്. പരിക്കേറ്റവർക്ക് താമരശ്ശേരി ആശുപത്രിയിൽ പ്രാഥമിക ചികിത്സ നൽകിയശേഷം കോഴിക്കോട്ടെ സ്വകാര്യ ആശുപത്രിയിലേക്ക് മാറ്റി.