കൊച്ചി: കരുവന്നൂര്‍ ബാങ്ക് തട്ടിപ്പ് കേസില്‍ ഇ ഡി റിമാന്‍ഡ് റിപ്പോര്‍ട്ടില്‍ പറയുന്ന ചന്ദ്രമതി തന്റെ മാതാവല്ലെന്ന് സിപിഎം കൗണ്‍സിലര്‍ പി ആര്‍ അരവിന്ദാക്ഷന്‍. ഇ ഡി വ്യാജ ആരോപണങ്ങളാണ് ഉന്നയിക്കുന്നതെന്ന് അരവിന്ദാക്ഷന്‍ കോടതിയില്‍ പറഞ്ഞു.
തന്റെ അമ്മയ്‌ക്ക് ഇ ഡി പറയുന്ന തരത്തില്‍ ഒരു അക്കൗണ്ടോ, ബാങ്ക് നിക്ഷേപമോ ഇല്ലെന്നാണ് അരവിന്ദാക്ഷന്‍ കോടതിയെ അറിയിച്ചത്. എന്നാല്‍, അരവിന്ദാക്ഷന്റെ അമ്മയുടെ അക്കൗണ്ട് തന്നെയാണെന്ന് ഇഡി ആവര്‍ത്തിച്ചു. ചോദ്യം ചെയ്തപ്പോള്‍ അരവിന്ദാക്ഷന്‍ സമ്മതിച്ചതാണ് ഇക്കാര്യം.
അന്വേഷണത്തോട് സര്‍ക്കാര്‍ സംവിധാനങ്ങള്‍ സഹകരിക്കുന്നില്ലെന്നും ഇഡി കുറ്റപ്പെടുത്തി. തെറ്റായ വിവരങ്ങള്‍ നല്‍കി അന്വേഷണത്തെ വഴിതെറ്റിക്കാനാണ് നീക്കം.അന്വേഷണത്തിനുളള രേഖകള്‍ ക്രൈംബ്രാഞ്ച് കൈമാറുന്നില്ലെന്നും ഇഡി കോടതിയെ അറിയിച്ചു.
കരുവന്നൂര്‍ കേസില്‍ റിമാന്‍ഡിലുള്ള പി ആര്‍ അരവിന്ദാക്ഷനെ കസ്റ്റഡിയില്‍ അവശ്യപ്പെട്ട് എന്‍ഫോഴ്‌സ്‌മെന്റ് ഡയറക്ടറേറ്റ് നല്‍കിയ ഹര്‍ജി പരിഗണിക്കുകയായിരുന്നു കോടതി.
