പാലക്കാട്: അടക്ക മോഷ്ടിച്ച യുവാവിനെ തല്ലി ചതച്ച് സ്ഥലയുടമ. പാലക്കാട് ശ്രീകൃഷ്ണപുരത്താണ് സംഭവം. ശ്രീകൃഷ്ണപുരം സ്വദേശി മുരളീധരനാണ് ക്രൂരമര്‍ദ്ദനത്തിനിരയായത്. സംഭവത്തിന് പിന്നാലെ പരിക്കേറ്റ് പാടത്ത് കിടന്ന ഇയാളെ നാട്ടുകാരാണ് ആശുപത്രിയിലെത്തിച്ചത്.
ഈ മാസം അഞ്ചിനാണ് കേസിനാസ്പദമായ സംഭവം നടന്നത്. അടക്ക മോഷ്ടിച്ചതിന് മുരളീധരനെ കെട്ടിയിട്ട് ആക്രമിക്കുകയായിരുന്നു. തുടര്‍ന്ന് പരിക്കേറ്റ് പാടത്ത് കിടക്കുകയായിരുന്ന മുരളീധരനെ നാട്ടുകാരാണ് ആശുപത്രിയില്‍ എത്തിക്കുകയായിരുന്നു. ഗുരുതരമായി പരിക്കേറ്റ മുരളീധരന്‍ പാലക്കാട് ജില്ലാ ആശുപത്രിയില്‍ ചികിത്സയിലാണ്. മര്‍ദ്ദനത്തില്‍ വാരിയെല്ലിന് ക്ഷതമേറ്റിട്ടുണ്ട്.
സംഭവത്തില്‍ നാട്ടുകാര്‍ പോലീസില്‍ പരാതി നല്‍കിയെങ്കിലും പോലീസ് മെല്ലപ്പോക്ക് തുടരുകയാണെന്ന് നാട്ടുകാര്‍ ആരോപിക്കുന്നു. തുടര്‍ന്ന് ഡിവൈഎസ്പിയെ സമീപിച്ചതോടെയാണ് പോലീസ് കേസെടുത്തത്. ജാമ്യം കിട്ടാവുന്ന വകുപ്പ് പ്രകാരമാണ് കേസെടുത്തിരിക്കുന്നതെന്നും നാട്ടുകാര്‍ പറയുന്നു.
പ്രതികരിക്കാൻ ഇവിടെ എഴുതുക: