ലക്‌നൗ: സനാതന ധര്‍മ്മത്തിന്റെ പ്രാധാന്യം ഓര്‍മിച്ച് ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ്. സനാതന ധര്‍മ്മം മാത്രമാണ് മതമെന്നും മറ്റുള്ള എല്ലാ വിഭാഗങ്ങളും ആരാധന രീതികളാണെന്നും അദ്ദേഹം പറഞ്ഞു. സനാതന ധര്‍മ്മം മാനവികതയുടെ മതമാണ്. അതിനെതിരായ ഏതൊരു ആക്രമണവും മുഴുവന്‍ മനുഷ്യരാശിയെയും അപകടത്തിലാക്കുമെന്നും യോഗി ആദിത്യനാഥ് കൂട്ടിച്ചേര്‍ത്തു. ഗോരഖ്‌നാഥ് ക്ഷേത്രത്തില്‍ നടന്ന ശ്രീമദ് ഭഗവത് കഥാ ജ്ഞാന യാഗത്തിന്റെ സമാപന സമ്മേളനത്തില്‍ സംസാരിക്കുകയായിരുന്നു അദ്ദേഹം.
തുറന്ന മനസുണ്ടായാല്‍ മാത്രമാകും ശ്രീമദ് ഭാഗവതത്തിന്റെ അന്തസത്ത മനസിലാക്കാന്‍ കഴിയൂവെന്നും അദ്ദേഹം പറഞ്ഞു. ഇടുങ്ങിയ ചിന്താഗതിയുള്ളവര്‍ കാഴ്ചപ്പാടുകളുടെ വിശാലത മനസിലാക്കാന്‍ ബുദ്ധിമുട്ട് നേരിടുന്നു. ശ്രവിക്കുന്ന ഭഗവദ് കഥാപാഠങ്ങള്‍ ജീവിതത്തില്‍ നല്ല മാറ്റങ്ങള്‍ സൃഷ്ടിക്കും. മൂല്യവത്തായ നിരവധി കാര്യങ്ങള്‍ കേള്‍ക്കാനുള്ള അവസരമായിരുന്നു ഇത്. ഭഗവത്ഗീതയ്‌ക്ക് അതിരുകള്‍ ഇല്ലെന്നും പ്രത്യേക ദിവസങ്ങളിലേക്കോ മണിക്കൂറുകളിലേക്കോ ഒതുക്കേണ്ടതല്ലെന്നും അദ്ദേഹം ഓര്‍മ്മിപ്പിച്ചു.
തമിഴ്‌നാട് മുഖ്യമന്ത്രിയുടെ മകന്‍ ഉദയനിധി സ്റ്റാലിന്റെ വിവാദ പരാമര്‍ശത്തിന് പിന്നാലെയാണ് യോഗി ആദിത്യനാഥിന്റെ പ്രതികരണം. സനാതന ധര്‍മ്മത്തെ ഡെങ്കിയോടും മലേറിയയോടും ഉപമിച്ചായിരുന്നു ഉദയനിധിയുടെ പരാമര്‍ശം. കുറച്ച് കാര്യങ്ങള്‍ എതിര്‍ക്കാന്‍ കഴിയില്ല, അത് ഇല്ലാതാക്കണം. ഡെങ്കി, മലേറിയ, കൊറോണ എന്നിവയെ നമുക്ക് എതിര്‍ക്കാന്‍ കഴിയില്ല. നമ്മള്‍ ഇത് ഇല്ലാതാക്കണം. അതേ രീതിയിലാണ് സനാതനത്തെയും ഉന്മൂലനം ചെയ്യേണ്ടതെന്നുമായിരുന്നു ഉദയനിധി സ്റ്റാലിന്റെ പരാമര്‍ശം.
പ്രതികരിക്കാൻ ഇവിടെ എഴുതുക: