കൊല്ലം: കോട്ടുക്കലിലെ വീടിനുള്ളിൽ രഹസ്യ അറയിൽ ഒളിപ്പിച്ച് മദ്യം വിറ്റ സംഭവത്തിൽ രണ്ട് പേർ അറസ്റ്റിൽ. ചടയമംഗലം എക്‌സൈസാണ് പ്രതികളെ പിടികൂടിയത്. സംഭവത്തിൽ തമ്പുരാൻ മുക്ക് സ്വദേശി വേണുവും ക്ലച്ച് തുളസി എന്ന തുളസീധരനുമാണ് അറസ്റ്റിലായത്. അനധികൃതമായി മദ്യം സൂക്ഷിച്ച് വിൽപ്പന നടത്തിയതിനെ തുടർന്നാണ് അറസ്റ്റ്.
തുളസീധരനിൽ നിന്ന് 14 കുപ്പി മദ്യവും വേണുവിന്റെ വീടിന്റെ കിടപ്പു മുറിയിലെ രഹസ്യ അറയ്‌ക്കുള്ളിൽ നിന്ന് 11 കുപ്പി ഇന്ത്യൻ നിർമ്മിത വിദേശ മദ്യവുമാണ് കണ്ടെത്തിയത്. ബിവറേജസ് ഔട്ട്‌ലെറ്റുകളിൽ നിന്നും മദ്യം വാങ്ങി സൂക്ഷിച്ച് ഒരു കുപ്പിക്ക് 100 മുതൽ 200 രൂപ വരെ അധികം ഈടാക്കിയാണ് കച്ചവടം നടത്തിയിരുന്നത്.
ഒരു ദിവസം തന്നെ നിരവധി തവണ വാങ്ങുന്ന മദ്യക്കുപ്പികൾ വീട്ടിലും പരിസരത്തുമായി ഒളിപ്പിച്ച് വെച്ച് അവധി ദിനങ്ങളിൽ വിൽപ്പന നടത്തുന്നതായിരുന്നു പ്രതികളുടെ രീതി.
പ്രതികരിക്കാൻ ഇവിടെ എഴുതുക: