തിരുവനന്തപുരം: തിരുവനന്തപുരം മെഡിക്കല് കോളജില് കിടപ്പ് രോഗികള്ക്കുള്ള പാല് വിതരണം നിര്ത്തി മില്മ. കുടിശിക ഇനത്തില് ഒരു കോടി 19 ലക്ഷം രൂപയാണ് മില്മയ്ക്ക് നല്കാനുള്ളത്. ഇത് ലഭിച്ചില്ലെന്ന് ചൂണ്ടിക്കാട്ടിയാണ് മില്മ പാല് വിതരണം നിര്ത്തിയത്. മെയ് മാസം മുതലുള്ള കുടിശികയാണ് മില്മയ്ക്ക് ലഭിക്കാനുള്ളത്.
മെഡിക്കല് കോളജില് കിടത്തി ചികിത്സയ്ക്കുന്ന രോഗികള്ക്കാണ് എല്ലാ ദിവസവും ഒരു നേരം പാല് നല്കിയിരുന്നത്. 500 മില്ലി ലിറ്ററിന്റെ ആയിരം പാക്കറ്റുകളാണ് വിതരണം ചെയ്തുവരുന്നത്. മെയ് 22 മുതലുള്ള കുടിശിക അടക്കണമെന്ന് ആവശ്യപ്പെട്ട് മെഡിക്കല് കോളജ് സൂപ്രണ്ട് ഉള്പ്പെടുള്ളവര്ക്ക് നിരവധി തവണ കത്ത് അയച്ചിരുന്നു. കത്തിന് മറുപടിയൊന്നും ലഭിക്കാത്ത സാഹചര്യത്തിലാണ് മില്മയുടെ നടപടി. നേരത്തെ ബ്രെഡും രോഗികള്ക്ക് നല്കിയിരുന്നെങ്കിലും ഇപ്പോള് അതും ലഭ്യമല്ല.
