ശ്രീനഗര്: അനന്തനാഗിലുണ്ടായ ഏറ്റുമുട്ടലില് വീരമൃത്യു വരിച്ച പോലീസ് ഉദ്യോഗസ്ഥനെയും അദ്ദേഹത്തിന്റെ കുഞ്ഞിനുമെതിരെ വിദ്വേഷ പ്രസ്താവന നടത്തിയാള് അറസ്റ്റില്. വീരമൃത്യു വരിച്ച ഡിവൈഎസ്പി ഹുമയൂണ് ഭട്ടിനെയും ഒരു മാസം പ്രായമുള്ള മകനുമെതിരെ വിദ്വേഷ പ്രസ്താവന നടത്തിയ 43-കാരന് ഇര്ഫാന് മാലിക്കാണ് പിടിയിലായത്. കശ്മീരിലെ സൈബര് ഇന്വെസ്റ്റിഗേഷന് യൂണിറ്റാണ് ഇയാളെ അറസ്റ്റ് ചെയ്തത്.
സോഷ്യല് മീഡിയ പ്ലാറ്റ്ഫോമുകള് ദുരുപയോഗം ചെയ്യുക, സുരക്ഷാ ഉദ്യോഗസ്ഥര്ക്കെതിരെ ഭീഷണി മുഴക്കുക, തീവ്രവാദം പ്രോത്സാഹിപ്പിക്കുക തുടങ്ങിയ കുറ്റങ്ങള് ചുമത്തിയാണ് അറസ്റ്റ് രേഖപ്പെടുത്തിയത്. സംഭവത്തില് അന്വേഷണം പുരോഗമിക്കുകയാണ്.
അനന്ത്നാഗ് ജില്ലയില് ഭീകരരുമായുണ്ടായ ഏറ്റുമുട്ടലിലാണ് ഡിഎസ്പി ഹുമയൂണ് ഭട്ട് വീരമൃത്യു വരിച്ചത്. ഒരു മാസം പ്രായമായ മകനെ കണ്ട് കൊതി തീരാതെയാണ് ഹുമയൂണ് ഭട്ട് മരണമടഞ്ഞത്. ഇതിനു പിന്നാലെയാണ് സമൂഹമാദ്ധ്യമങ്ങളിലൂടെ വിദ്വേഷകരമായ പോസ്റ്റ് പങ്കുവെച്ചത്.
