കടമക്കുടിയിലെ കൂട്ട ആത്മഹത്യ; ബന്ധുക്കളെ ഭീഷണിപ്പെടുത്തുന്നുവെന്ന് പരാതി; ലോൺ ആപ്പിനെതിരെ കേസെടുത്ത് പോലീസ്

എറണാകുളം: കൊച്ചി കടമക്കുടിയിൽ ഒരു കുടുംബത്തിലെ നാല് പേർ ആത്മഹത്യ ചെയ്ത സംഭവത്തിൽ ഓൺലൈൻ ലോൺ ആപ്പിനെതിരെ കേസെടുത്ത് പോലീസ്. വരാപ്പുഴ പോലീസാണ് ആപ്പിനെതിരെ കേസെടുത്തത്. മോർഫ് ചെയ്ത ചിത്രങ്ങളുപയോഗിച്ച് വീണ്ടും കുടുംബത്തിന് നേരെ ഭീഷണി ഉണ്ടാകുന്നുണ്ടെന്നാണ് പരാതി.

കടമക്കുടി മാടശ്ശേരി നിജോ (39) ഭാര്യ ശിൽപ, മക്കൾ ഏബൽ (7), ആരോൺ(5) എന്നിവരെയാണ് കഴിഞ്ഞദിവസം മരിച്ച നിലയിൽ കണ്ടെത്തിയത്. നിജോയും ഭാര്യയും തൂങ്ങി മരിച്ച നിലയിലും എബലും ആരോണും വിഷം ഉള്ളിൽ ചെന്ന് കട്ടിലിൽ മരിച്ച് കിടക്കുന്ന നിലയിലുമായിരുന്നു കണ്ടെത്തിയത്.

മരണത്തിന് ശേഷവും ശിൽപ്പയുടെ മോർഫ് ചെയ്ത ചിത്രത്തിനൊപ്പം ചില ഓഡിയോ സന്ദേശങ്ങളും ബന്ധുക്കളുടെ ഫോണിലേക്ക് എത്തുന്നുണ്ട്. ശ്രീലങ്കയിൽ രജിസ്റ്റർ ചെയ്തിട്ടുള്ള നമ്പരിൽ നിന്നാണ് കോൾ വരുന്നത്. ലിജോയുടെയും ഭാര്യയുടെയും ഫോണുകൾ പോലീസ് ഫൊറൻസിക് പരിശോധനയ്‌ക്ക് അയച്ചിട്ടുണ്ട്.