തിരുവനന്തപുരം: കാട്ടാക്കടയില് പത്താം ക്ലാസുകാരനെ കാറിടിച്ച് കൊലപ്പെടുത്തിയ കേസിലെ പ്രതി പ്രിയരഞ്ജനെ സംഭവസ്ഥലത്തെത്തിച്ചു തെളിവെടുത്തു. മനപൂര്വ്വം കൊലപാതകം നടത്തിയതല്ലെന്നും ആക്സിലേറ്ററില് കാല് അമര്ന്നു പോയതാണെന്നും പ്രതി പൊലീസിനോട് പറഞ്ഞു.
പ്രതിയെ വൈദ്യ പരിശോധന നടത്തിയ ശേഷം ആദിശേഖര് കൊല്ലപ്പെട്ട പുളിങ്കോട് ക്ഷേത്രത്തിനു മുന്നിലെ റോഡിലെത്തിച്ചാണ് തെളിവെടുപ്പ് നടത്തിയത്. തമിഴ്നാട്ടിലെ കുഴിത്തുറയില് നിന്നാണ് കഴിഞ്ഞ ദിവസം പ്രതിയെ പിടികൂടിയത്. പ്രതി ഉപയോഗിച്ച കാര് , കൊല്ലപ്പെട്ട ആദിശേഖര് ഓടിച്ച സൈക്കിള് എന്നിവയുടെ പരിശോധന മോട്ടോര് വാഹന വകുപ്പ് പൂര്ത്തിയാക്കി. അതേസമയം പ്രതി പ്രിയരഞ്ജന്റെ ഭാര്യ സാമൂഹ്യ മാധ്യമങ്ങളിലൂടെ കുടുംബത്തിനെതിരെ അധിക്ഷേപം നടത്തുന്നതായി ആദിശേഖറിന്റെ കുടുംബം കുറ്റപ്പെടുത്തി.
പത്താം ക്ലാസ് വിദ്യാര്ത്ഥിയായ ആദിശേഖര് കഴിഞ്ഞമാസം 30നായിരുന്നു പ്രിയരഞ്ജന് ഓടിച്ച കാര് ഇടിച്ച് കൊല്ലപ്പെട്ടത്.പ്രിയരഞ്ജന് ക്ഷേത്ര മതിലില് മൂത്രമൊഴിച്ചത് ചോദ്യം ചെയ്ത വൈരാഗ്യമാണ് കൊലയ്ക്ക് പിന്നിലെന്നാണ് കരുതുന്നത്. ആരോപണത്തിന് ബലമേകുന്ന സിസിടിവി ദൃശ്യങ്ങള് പുറത്തുവന്നിരുന്നു. മറ്റ് നടപടികള് പൂര്ത്തിയാക്കിയ ശേഷം പ്രതിയെ കോടതിയില് ഹാജരാക്കി നാളെ കസ്റ്റഡി അപേക്ഷ നല്കും. ഇതിന് ശേഷമാകും വിശദമായ തെളിവെടുപ്പും ചോദ്യം ചെയ്യലുമെന്ന് പൊലീസ് അറിയിച്ചു.
