കൊച്ചി: എറണാകുളം ജനറല് ആശുപത്രിയില് വനിതാ ഡോക്ടറെ ചുംബിച്ചെന്ന പരാതിയില് കേസെടുത്ത ഡോ. മനോജിനെതിരെ വീണ്ടും കേസ്. 2018 ല് ആശുപത്രിയില് ജോലി ചെയ്തിരുന്ന മറ്റൊരു വനിതാ ഡോക്ടറാണ് പരാതിയുമായി എത്തിയിരിക്കുന്നത്. ഇ മെയില് വഴിയാണ് ഇവര് പരാതി സമര്പ്പിച്ചത്. ജനറല് മെഡിസിന് വിഭാഗം മേധാവിയായിരുന്ന ഡോ. മനോജ് അപമര്യാദയായി പെരുമാറിയെന്നാണ് പരാതി.
എറണാകുളം സെന്ട്രല് പോലീസിനാണ് ഇവര് പരാതി നല്കിയത്. ഡോ. മനോജിനെതിരെ പോലീസ് കേസ് രജിസ്റ്റര് ചെയ്തു. പരാതിക്കാരിയുടെ മൊഴിയെടുത്ത ശേഷമായിരിക്കും തുടര്നടപടികളെന്ന് പോലീസ് അറിയിച്ചു. എറണാകുളം ജനറല് ആശുപത്രിയില് 2019 ല് ജനറല് മെഡിസിന് വിഭാഗം മേധാവിയായിരുന്ന ഡോ. മനോജിനെതിരെ നേരത്തെ ബലാത്സംഗകുറ്റം ചുമത്തിയാണ് കേസെടുത്തത്. ഹൗസ് സര്ജന്സിയില് ഇന്റേണ്ഷിപ്പ് ചെയ്തിരുന്ന വനിതാ ഡോക്ടര്ക്ക് നേരെയായിരുന്നു ഇയാളുടെ ലൈംഗികാതിക്രമം.
താന് നേരിട്ട ലൈംഗിക അതിക്രമം വിവരിച്ച് വനിതാ ഡോക്ടര് ഫെയ്സ്ബുക്കില് ഒരു കുറിപ്പിട്ടിരുന്നു. പിന്നീടാണ് പോലീസില് പരാതി നല്കിയത്. ഇതിന് പിന്നാലെ ആരോഗ്യമന്ത്രിയടക്കം ഇടപെട്ട് കര്ശന നടപടിയെടുക്കാന് നിര്ദേശം നല്കി. പിന്നാലെയാണ് വനിതാ ഡോക്ടര് ഇ-മെയില് വഴി പരാതി സമര്പ്പിച്ചത്. എന്നാല് ഡോക്ടറുടെ അറസ്റ്റ് ജില്ലാ സെഷന്സ് കേടതി തടഞ്ഞിട്ടുണ്ട്. നിലവില് ആലുവ ജില്ലാ ആശുപത്രിയില് ജോലി ചെയ്യുകയാണ് ഡോ. മനോജ്.
