അയോദ്ധ്യയിലെ മര്യാദ പുരുഷോത്തം ശ്രീരാം അന്താരാഷ്‌ട്ര വിമാനത്താവളം; ആദ്യ സർവീസ് നവംബറിൽ

ന്യൂഡൽഹി: അയോദ്ധ്യ അന്താരാഷ്‌ട്ര വിമാനത്താവളത്തിൽ നിന്നുമുള്ള ആഭ്യന്തര വിമാനസർവീസുകൾ നവംബറിൽ ആരംഭിക്കും. മര്യാദ പുരുഷോത്തം ശ്രീരാം ഇന്റർനാഷണൽ എയർപോർട്ട് എന്നാണ് വിമാനത്താവളത്തിന്റെ ഔദ്യോഗിക നാമം. ഒക്ടോബർ അവസാനത്തോടെ നിർമാണത്തിന്റെ ആദ്യഘട്ടം പൂർത്തിയാക്കിയേക്കും. ടെർമിനൽ കെട്ടിടത്തിന്റെ നിർമാണം 25 ശതമാനം പൂർത്തിയാക്കിയതായും വളരെ പെട്ടെന്ന് തന്നെ പ്രവർത്തനക്ഷമമാക്കുന്നതിനുള്ള ശ്രമത്തിലാണെന്നും വിമാനത്താവളത്തിന്റെ ഡയറക്ടർ വിനോദ് കുമാർ പറഞ്ഞു.

2,200 മീറ്റർ ദൈർഘ്യമുള്ള റൺവേയുടെ നിർമാണം ഇതിനോകം തന്നെ പൂർത്തിയാക്കിയിട്ടുണ്ട്. നിർമാണ പ്രവൃത്തിയുടെ രണ്ടാം ഘട്ടത്തിൽ റൺവേയുടെ നീളം 3,125 മീറ്ററായും മൂന്നാം ഘട്ടത്തിൽ 3,750 മീറ്ററായും വർദ്ധിപ്പിക്കും. മൂന്നാം ഘട്ടം പൂർത്തിയായതിന് ശേഷമാകും ഇവിടെ നിന്ന് അന്താരാഷ്‌ട്ര വിമാനസർവീസുകൾ ആരംഭിക്കുക. ഒക്ടോബറിൽ ടെർമിനൽ നിർമാണം പൂർത്തിയാകുന്നതോടെ വിമാനസർവീസുകൾ ആരംഭിക്കുന്നതിനുള്ള അനുമതി തേടി ഡയറക്ടർ ജനറൽ ഓഫ് സിവിൽ ഏവിയേഷനെ സമീപിക്കും.

വിമാനത്താവളത്തിന്റെ പരിശോധനയ്‌ക്ക് ശേഷം സർവീസുകൾക്കുള്ള അനുമതി ലഭിക്കുമെന്നും വിനോദ് കുമാർ വ്യക്തമാക്കി. വിമാനത്താവളത്തിനായി 821 ഏക്കർ ഭൂമിയാണ് വേണ്ടത്. ഇതിൽ 799 ഏക്കർ സ്ഥലം ഇതിനോടകം ഏറ്റെടുത്ത് കഴിഞ്ഞു. ആദ്യഘട്ടത്തിൽ ഡൽഹി, മുംബൈ, ബെംഗളൂരു, ഹൈദരാബാദ് എന്നീ പ്രധാനനഗരങ്ങളിലേക്ക് അയോദ്ധ്യയിൽ നിന്ന് വിമാനസർവീസുകൾ ഉണ്ടാകും.