ആറ് മാസത്തെ ബഹിരാകാശ ദൗത്യത്തിന് ശേഷം ഭൂമിയിലേക്ക് തിരികെയെത്തിയ സുൽത്താൻ അൽ നിയാദി പൂർണ ആരോഗ്യവാനെന്ന് റിപ്പോർട്ട്. ഭൂമിയിലെത്തിയതിന് ശേഷം ആദ്യമായി സമൂഹമാദ്ധ്യമത്തിലൂടെ നടത്തിയ പ്രതികരണത്തിലാണ് അദ്ദേഹം ഇക്കാര്യം വ്യക്തമാക്കിയത്. യുഎസിലെ ഹ്യൂസ്റ്റണിൽ ആരോഗ്യ പരിചരണത്തിലാണ് നിലവിൽ അദ്ദേഹമുള്ളത്.
പിന്തുണയും സഹായവുമായി ഒപ്പം നിന്നവർക്ക് നന്ദിയെന്നായിരുന്നു അദ്ദേഹം എക്സിൽ കുറിച്ചത്. താനിപ്പോൾ പൂർണ ആരോഗ്യവാനാണെന്നും വൈകാതെ കണ്ടുമുട്ടാമെന്നുമാണ് അദ്ദേഹം കുറിച്ചത്. അറബ് ലോകത്തെ തന്നെ ആദ്യ ദീർഘ ദൂപ ബഹിരാകാശ ദൗത്യം പൂർത്തിയാക്കിയാണ് നിയാദിയുടെ മടക്കം. തിങ്കളാഴ്ച രാവിലെയാണ് അദ്ദേഹം ഭൂമിയിൽ എത്തുന്നത്. ഇനിയുള്ള 14 ദിവസം അദ്ദേഹം ഹ്യൂസ്റ്റണിൽ തങ്ങിയ ശേഷമാകും യുഎഇയിലേക്ക് തിരികെയെത്തുകയെന്നാണ് ലഭ്യമാകുന്ന വിവരം.
ഒരാഴ്ച യുഎഇയിൽ തങ്ങിയ ശേഷം പരീക്ഷണങ്ങൾ തുടരുന്നതിനായി അദ്ദേഹം ഹ്യൂസ്റ്റണിലേക്ക് തന്നെ മടങ്ങും. രാജ്യത്ത് സുൽത്താൻ അൽ നിയാദിക്ക് ഗംഭിര സ്വീകരണം നൽകുന്നതിന് വേണ്ടിയുള്ള ഒരുക്കങ്ങൾ പുരോഗമിച്ചുകൊണ്ടിരിക്കുകയാണ്.
