കിഡ്‌സ് ബാസ്‌ക്കറ്റ് ബോള്‍ ചാമ്പ്യന്‍ഷിപ്പ്: കോഴിക്കോടിന് ഇരട്ടക്കിരീടം

ആലപ്പുഴ: രണ്ടാമത് കിഡ്‌സ് ബാസ്‌ക്കറ്റ് ബോള്‍ ചാമ്പ്യന്‍ഷിപ്പില്‍ കോഴിക്കോട് ഇരട്ടക്കിരീടം സ്വന്തമാക്കി. ആണ്‍കുട്ടികളുടെയും പെണ്‍കുട്ടികളുടെയും ഫൈനല്‍ മത്സരത്തില്‍ ആതിഥേയരായ ആലപ്പുഴയെ തോല്‍പ്പിച്ച് രണ്ടിലും കോഴിക്കോട് കിരീടം നേടി. ആലപ്പുഴ ആല്‍ഫ ജീനിയസ് സ്‌കൂള്‍ ഇന്‍ഡോര്‍ സ്റ്റേഡിയത്തില്‍ ദിവസങ്ങളായി നടന്നുവന്ന രണ്ടാം കിഡ്സ് ബാസ്‌ക്കറ്റ് ബോള്‍ ചാമ്പ്യന്‍ഷിപ്പിന് ഇതോടെ തിരശീല വീണു.

അധികസമയത്തേക്ക് നീണ്ട ആണ്‍കുട്ടികളുടെ ഫൈനലില്‍ 55-43നാണ് കോഴിക്കോട് ജയിച്ചത്. നിശ്ചിത സമയ മത്സരം 40-40ന് സമനിലയിലായതോടെയാണ് മത്സരം അധികസമയത്തിലേക്ക് നീണ്ടത്. പെണ്‍കുട്ടികളുടെ ഫൈനലില്‍ 25 പോയിന്റ് നേടിയ അക്ഷരയുടെ മികവില്‍ കോഴിക്കോട് ആലപ്പുഴയെ 27-15ന് തോല്‍പിച്ച് ചാമ്പ്യന്മാരാകുകയായിരുന്നു.
കോഴിക്കോട് ഇരട്ടക്കിരീടം നേടിയ ടൂര്‍ണമെന്റില്‍ എറണാകുളം ഇരട്ട വെങ്കലനേട്ടം കൊയ്തു. ആണ്‍കുട്ടികളുടെ മൂന്നാം സ്ഥാന പോരാട്ടത്തില്‍ തിരുവനന്തപുരത്തെയും (34-23), പെണ്‍കുട്ടികളില്‍ കോട്ടയത്തെയും (25-15) തോല്‍പ്പിച്ചുകൊണ്ട് എറണാകുളം മൂന്നാം സ്ഥാനം ആഘോഷിച്ചു.
നേരത്തെ പെണ്‍കുട്ടികളുടെ സെമിയില്‍ ആലപ്പുഴ കോട്ടയത്തെ തോല്‍പിച്ചപ്പോള്‍ (22-12) കോഴിക്കോട് എറണാകുളത്തെ (37-10) തോല്‍പിച്ച് ഫൈനലിലെത്തിയപ്പോള്‍ ആണ്‍കുട്ടികളുടെ സെമിയില്‍ ആലപ്പുഴ തിരുവനന്തപുരത്തെയും (42-14) കോഴിക്കോട് എറണാകുളത്തെയും (38-30) തോല്‍പിച്ച് ഫൈനലില്‍ പ്രവേശിക്കുകയായിരുന്നു.