തിരുവനന്തപുരം: ആഭ്യന്തര കലാപം സൃഷ്ടിക്കുന്നതിന് വ്യാജ വാര്ത്ത പ്രചരിപ്പിച്ചെന്ന കേസില് ഓണ്ലൈന് മാധ്യമം മറുനാടന് മലയാളിയുടെ ചീഫ് എഡിറ്റര് ഷാജന് സ്കറിയയ്ക്ക് കോടതിയുടെ മുന്കൂര് ജാമ്യം. അന്വേഷണ ഉദ്യോഗസ്ഥനായ മെഡിക്കല് കോളേജ് സി.ഐക്ക് മുന്നില് അടുത്ത മാസം ഒന്നിനും രണ്ടിനും ഹാജരാകണമെന്നാണ് കോടതി നിര്ദ്ദേശം.
തെളിവ് ശേഖരണത്തിനായി ഷാജന് സ്കറിയയെ അന്വേഷണ ഉദ്യോഗസ്ഥന് അറസ്റ്റ് ചെയ്യാമെങ്കിലും 50,000 രൂപയുടെ ജാമ്യത്തില് വിട്ടയക്കണമെന്ന് കോടതി നിര്ദ്ദേശിച്ചു.
ആറാം അഡീഷണല് ജില്ലാ സെഷന്സ് ജഡ്ജി കെ വിഷ്ണുവാണ് കേസ് പരിഗണിച്ചത്. പൊലീസിന്റെ ശക്തമായ എതിര്പ്പ് മറികടന്നാണ് ജാമ്യം അനുവദിച്ചത്. പ്രതിയെ കസ്റ്റഡിയില് ചോദ്യം ചെയ്താലെ വ്യാജ വാര്ത്തയുടെ ഉറവിടം കണ്ടെത്താനാകൂ എന്നാണ് പ്രോസിക്യൂഷന് വാദിച്ചത്.. തുടര്ന്നാണ് ആവശ്യമെങ്കില് അറസ്റ്റ് ചെയ്ത് ജാമ്യത്തില് വിടാന് കോടതി നിര്ദ്ദേശം നല്കിയത്.
പ്രധാനമന്ത്രിയുടെ കേരള സന്ദര്ശനത്തിനിടെ അദ്ദേഹത്തെ വധിക്കാന് കേരളത്തില് ശ്രമം നടക്കുന്നു എന്നാണ് മേയ് 6ന് വാര്ത്ത നല്കിയത്. സംസ്ഥാന സര്ക്കാര് ഇതിനെ പ്രതിരോധിക്കാന് നടപടി ഒന്നും സ്വീകരിക്കുന്നില്ലെന്ന് വാര്ത്തയില് കുറ്റപ്പെടുത്തിയിരുന്നു. പ്രധാന മന്ത്രിയുടെ സുരക്ഷാ ഏര്പ്പാടുകള് ചോര്ന്നത് ഇതിന്റെ ഭാഗമായാണെന്നും ഷാജന് സ്കറിയ വാര്ത്തയില് കുറ്റപ്പെടുത്തിയിരുന്നു. ഇതാണ് കേസിനാധാരം.
