ചെന്നൈ: തമിഴ്‌നാട്ടിലെ മധുരയില്‍ ട്രെയിന്‍ കോച്ചിന് തീപിടിച്ച് ഒമ്പതുപേര്‍ മരിച്ചു. 20 പേര്‍ക്ക് പരിക്കേറ്റു. ഇതിൽ നാലു പേരുടെ നില ഗുരുതരമാണെന്നാണ് വിവരം. ശബ്ദമോൻ സിങ് (65), മിഥിലേശ്വരി (64) എന്നിവരുടെ മൃതദേഹങ്ങൾ തിരിച്ചറിഞ്ഞിട്ടുണ്ട്. യുപി സ്വദേശികളാണ് മരിച്ചതെന്നാണ് റിപ്പോര്‍ട്ട്. തെക്കേ ഇന്ത്യയിലെ ക്ഷേത്രങ്ങള്‍ സന്ദര്‍ശിക്കുന്നതിനെത്തിയവരായിരുന്നു ഇവര്‍. മരണ സംഖ്യ ഇനിയും ഉയരാനാണ് സാധ്യത.
ലക്‌നോ-രാമേശ്വരം ടൂറിസ്റ്റ് ട്രെയിനിലെ സ്ലീപ്പർ കോച്ചിനാണ് തീപിടിച്ചത്. സ്‌റ്റേഷന് സമീപമുള്ള യാഡില്‍ നിര്‍ത്തിയിട്ടിരുക്കുമ്പോഴാണ് അപകടം. 63 പേരാണ് കോച്ചിലുണ്ടായിരുന്നത്. ട്രെയിനിനുള്ളില്‍ യാത്രക്കാർ ചായ ഉണ്ടാക്കാൻ ശ്രമിക്കുന്നതിനിടെ ഗ്യാസ് സിലിണ്ടര്‍ പൊട്ടിത്തെറിച്ചാണ് അപകടമുണ്ടായതെന്നാണ് പ്രാഥമിക വിവരം. തീ പിടിത്തത്തിൽ കോച്ച് പൂർണമായും കത്തി നശിച്ചു. രാവിലെ അഞ്ചിന് ആണ് അപകടമുണ്ടായത്.
ഈ മാസം 17 നാണ് 60 പേരടങ്ങുന്ന സംഘം ലക്‌നോവില്‍ നിന്നും പുറപ്പെട്ടത്. നാഗര്‍കോവിലിലെ ക്ഷേത്ര സന്ദര്‍ശനത്തിന് ശേഷം വെള്ളിയാഴ്ച രാത്രിയാണ് ഇവര്‍ മധുരയിലെത്തിയത്.
പ്രതികരിക്കാൻ ഇവിടെ എഴുതുക: