പുതിയ പദ്ധതികള്‍ക്കായി നിക്ഷേപം ആകര്‍ഷിക്കുന്നതില്‍ കേരളം പിന്നില്‍ ; ഉത്തർപ്രദേശും ഗുജറാത്തും മുന്നില്‍

ന്യൂദൽഹി: ബാങ്ക് സഹായത്തോടെ ആരംഭിക്കുന്ന പുതിയ പദ്ധതികളുടെ കാര്യത്തില്‍ കേരളം പിന്നിലെന്ന് റിസർവ് ബാങ്ക്. പുതിയ പദ്ധതികള്‍ നടപ്പാക്കുന്നതിനായി ബാങ്കുകള്‍ നല്‍കിയ പദ്ധതി തുക വിലയിരുത്തിയാണ് റിസര്‍വ്വ് ബാങ്ക് ഈ റിപ്പോര്‍ട്ട് പുറത്തുവിട്ടത്. കേന്ദ്രസര്‍ക്കാരിന്റെ അടിസ്ഥാനസൗകര്യ വികസനപദ്ധതികള്‍ക്കാണ് കൂടുതല്‍ നിക്ഷേപം ചെലവഴിച്ചത്.

കേന്ദ്രസര്‍ക്കാര്‍ നടപ്പാക്കുന്ന ഗ്രീന്‍ ഫീല്‍ഡ് പദ്ധതികള്‍, ഊര്‍ജ്ജം, റോഡ്, പാലം, ബയോടെക്, ടെലികോം, തുറമുഖം, വിമാനത്താവളങ്ങള്‍, പ്രത്യേക സാമ്പത്തിക മേഖല, ഐടി പാര്‍ക്കുകള്‍, അടിസ്ഥാനസൗകര്യവികസനത്തില്‍ തന്നെ പ്രാധാന്യമുള്ള റോഡുകള്‍, പാലങ്ങള്‍ എന്നിവയുടെ നിര്‍മ്മാണങ്ങ്‍ക്കുള്ള വിവിധ പദ്ധതികള്‍ക്ക് വേണ്ടി നിക്ഷേപങ്ങള്‍ ആകര്‍ഷിക്കുന്ന കാര്യത്തിലാണ് കേരളം പിന്നിലായിപ്പോയത്. ഇതില്‍ കേന്ദ്രസര്‍ക്കാര്‍ പദ്ധതികള്‍, സ്വകാര്യ- സര‍്ക്കാര്‍ പങ്കാളിത്ത പദ്ധതികള്‍, സ്വകാര്യമേഖലയിലെ കമ്പനികള്‍ മാത്രം നടപ്പാക്കുന്ന പദ്ധതികള്‍ എന്നിവ ഉള്‍പ്പെടും.

2022-23 കാലയളവിൽ ഇന്ത്യയിൽ വലിയ തോതിൽ പുതിയ പദ്ധതികള്‍ തുടങ്ങുന്നതിന് നിക്ഷേപങ്ങൾ എത്തിയിട്ടുണ്ടെന്ന് റിപ്പോർട്ടിൽ ചൂണ്ടിക്കാട്ടുന്നു. പുതിയ പദ്ധതികള്‍ തുടങ്ങാനാ വിവിധ സംസ്ഥാനങ്ങളിലായി 3 ലക്ഷം കോടിയിലധികം രൂപയുടെ പദ്ധതി നിക്ഷേപങ്ങൾ എത്തി. ഇതിൽ തന്നെ ഏറ്റവുമധികം പുതിയ പദ്ധതി തുടങ്ങുന്നതിന് നിക്ഷേപങ്ങൾ എത്തിയിരിക്കുന്നത് യുപി, മഹാരാഷ്‌ട്ര, ഒഡിഷ, കർണാടക, ഗുജറാത്ത് എന്നീ സംസ്ഥാനങ്ങളിലാണ്.

ഈ പട്ടികയിൽ ഏറ്റവും അവസാന സ്ഥാനത്തെത്തിയ മൂന്ന് സംസ്ഥാനങ്ങളിലൊന്നാണ് കേരളം. കേരളം, ഗോവ, അസം എന്നീ സംസ്ഥാനങ്ങളിലാണ് പുതിയ നിക്ഷേപങ്ങൾ കുറവുള്ളത്. മാത്രവുമല്ല, കേരളം പോലുള്ള സംസ്ഥാനങ്ങളിൽ ചെറിയ തുകയുടെ പദ്ധതികള്‍ മാത്രമാണ് എത്തുന്നത്. ഇതിനാലാണ് നിക്ഷേപങ്ങളുടെ കാര്യത്തിൽ കേരളം പിന്നോട്ട് പോകുന്നതെന്നും റിസര്‍വ്വ് ബാങ്ക് ചൂണ്ടിക്കാട്ടുന്നു. മൊത്തം നിക്ഷേപ പദ്ധതികളുടെ 0.9 ശതമാനം (2,399 കോടി രൂപ) മാത്രമാണ് കേരളത്തിന് ലഭിച്ചത്.

അതേസമയം ഉത്തർപ്രദേശാണ് പട്ടികയിൽ ഏറ്റവും മുന്നിൽ. നിക്ഷേപ പദ്ധതികളുടെ 16.2 ശതമാനവും (43,180 കോടി രൂപ) യുപിയിലാണ്. ഗുജറാത്ത് (14 ശതമാനം), ഒഡീഷ (11.8 ശതമാനം), മഹാരാഷ്‌ട്ര (7.9 ശതമാനം), കർണാടക (7.3 ശതമാനം) എന്നിങ്ങനെയാണ് മറ്റ് സംസ്ഥാനങ്ങളുടെ കണക്ക്. 2014-15 വർഷത്തിന് ശേഷം 3,52,624 കോടി രൂപയുടെ റെക്കോർഡ് മൂലധന നിക്ഷേപം ഇന്ത്യയിലുണ്ടായെന്നും റിപ്പോർട്ടിൽ പറയുന്നു. പദ്ധതികളിൽ ബാങ്കുകളുടെ സഹായം, സ്വകാര്യ ഫണ്ട് സമാഹരണം, വിദേശ വായ്പകൾ എന്നിവയും ഉൾപ്പെടുന്നു.