സഖറിയ മാര്‍ അന്തോണിയോസ് കാലം ചെയ്തു

പത്തനംതിട്ട: മലങ്കര ഓര്‍ത്തഡോക്സ് സഭയിലെ സീനിയര്‍ മെത്രാപ്പോലീത്ത സഖറിയ മാര്‍ അന്തോണിയോസ്(76) കാലം ചെയ്തു. ഇന്നലെ രാവിലെ ചെങ്ങന്നൂര്‍ കല്ലിശ്ശേരിയിലെ സ്വകാര്യ ആശുപത്രിയിലായിരുന്നു അന്ത്യം.
കൊല്ലം ഭദ്രാസനാധ്യക്ഷ സ്ഥാനത്തു നിന്ന് സ്വയം വിരമിച്ച മെത്രാപ്പോലീത്ത മല്ലപ്പള്ളി ആനിക്കാട് മാര്‍ അന്തോണിയോസ് ആശ്രമത്തില്‍ വിശ്രമജീവിതം നയിക്കുകയായിരുന്നു.
കബറടക്കം നാളെ ഉച്ചയ്‌ക്ക് രണ്ടിന് കൊല്ലം ശാസ്താംകോട്ട മൗണ്ട് ഹോറേബ് ആശ്രമ ചാപ്പലിനോടു ചേര്‍ന്നു തയാറാക്കിയ കബറിടത്തില്‍ നടക്കും.
പുനലൂര്‍ വാളക്കോട് ആറ്റുമാലില്‍ വരമ്പത്ത് ഡബ്ല്യു.സി. ഏബ്രഹാമിന്റെയും മറിയാമ്മ ഏബ്രഹാമിന്റെയും ആറു മക്കളില്‍ മൂത്തയാളാണ് അദ്ദേഹം. ഡബ്ല്യു.എ. ചെറിയാന്‍ എന്നായിരുന്നു ആദ്യ പേര്.
1974ല്‍ പൗരോഹിത്യം സ്വീകരിച്ചു. കൊല്ലത്തെ വിവിധ പള്ളികളില്‍ ശുശ്രൂഷ ചെയ്തു. 1989ല്‍ പത്തനംതിട്ടയില്‍ ചേര്‍ന്ന ഓര്‍ത്തഡോക്സ് സഭയുടെ മലങ്കര സുറിയാനി ക്രിസ്ത്യാനി അസോസിയേഷന്‍ യോഗം മെത്രാന്‍ സ്ഥാനത്തേക്ക് തെരഞ്ഞെടുത്തു. 1991 ഏപ്രില്‍ 30ന് പരുമലയില്‍ സഖറിയ മാര്‍ അന്തോണിയോസ് എന്ന പേരില്‍ മെത്രാനായി. സഭയുടെ വിവിധ ആത്മീയ സംഘടനകളുടെ അധ്യക്ഷ സ്ഥാനവും വഹിച്ചു.