കോട്ടയം: സമയ തര്‍ക്കത്തിന്റെ പേരില്‍ സ്വകാര്യ ബസ് കണ്ടക്ടറെ മര്‍ദ്ദിച്ച കേസില്‍ ഒളിവില്‍ കഴിഞ്ഞിരുന്നയാളെ പോലീസ് അറസ്റ്റ് ചെയ്തു. കുമ്മനം താഴത്തങ്ങാടി ഭാഗത്ത് ഇടവഴിക്കല്‍ വീട്ടില്‍ അമീനെ (30) യാളെയാണ് കോട്ടയം ഈസ്റ്റ് പോലീസ് അറസ്റ്റ് ചെയ്തത്. ഇയാളും സുഹൃത്തുക്കളും ചേര്‍ന്ന് നാഗമ്പടം ബസ്സ്റ്റാന്‍ഡില്‍ വച്ച് കഴിഞ്ഞദിവസം വൈകിട്ട് സ്വകാര്യ ബസ് കണ്ടക്ടറായ കടനാട് സ്വദേശി അമല്‍ ജെയിംസിനെ മര്‍ദ്ദിക്കുകയായിരുന്നു.
ബസ് ഓടിക്കുന്നതിന്റെ സമയവുമായി ബന്ധപ്പെട്ട് ഇവര്‍ക്കിടയില്‍ തര്‍ക്കം നിലനിന്നിരുന്നു. ഇതിന്റെ തുടര്‍ച്ചയെന്നോണമാണ് ഇവര്‍ സ്വകാര്യ ബസ് കണ്ടക്ടറെ മര്‍ദ്ദിച്ചത്. തുടര്‍ന്ന് ഇവര്‍ ഒളിവില്‍ പോവുകയും ചെയ്തു. പരാതിയെ തുടര്‍ന്ന് കോട്ടയം ഈസ്റ്റ് പോലീസ് കേസ് രജിസ്റ്റര്‍ ചെയ്യുകയും ഈ കേസിലെ മറ്റൊരു പ്രതിയായ ഷിബിന്‍ ചാക്കോയെ കഴിഞ്ഞ ദിവസം പിടികൂടിയിരുന്നു. തുടര്‍ന്നുള്ള തിരച്ചിലിലാണ് അമീന്‍ പോലീസിന്റെ പിടിയിലാവുന്നത്.
കോട്ടയം ഈസ്റ്റ് സ്റ്റേഷന്‍ എസ്എച്ച്ഒ യൂ.ശ്രീജിത്ത്, എസ്‌ഐ അനുരാജ് എം.എച്ച്, അനില്‍കുമാര്‍.കെ, സിപിഒമാരായ പ്രതീഷ് രാജ്, അജിത്ത്, അജേഷ്, എന്നിവര്‍ ചേര്‍ന്നാണ് ഇയാളെ അറസ്റ്റ് ചെയ്തത്. കോടതിയില്‍ ഹാജരാക്കിയ ഇയാളെ റിമാന്‍ഡ് ചെയ്തു.
പ്രതികരിക്കാൻ ഇവിടെ എഴുതുക: