തിരുവനന്തപുരം: പാമ്പിനെ ഉപയോഗിച്ച് പെണ്കുട്ടിയുടെ പിതാവിനെ കൊല്ലാന് ശ്രമിച്ച പ്രതിയെ പൊലീസ് പിടികൂടി. കാട്ടാക്കട അമ്പലത്തിന്കാലയിലാണ് സംഭവം.
കാട്ടാക്കടയില് കിച്ചു എന്ന ഗുണ്ട റാവു ആണ് പിടിയിലായത്. അമ്പലത്തിന്കാല സ്വദേശി രാജേന്ദ്രന്റെ വീട്ടിലാണ് രാത്രി പാമ്പിനെ കൊണ്ടിട്ടത്.
മകളെ ശല്യം ചെയ്തത് രാജേന്ദ്രന് വിലക്കിയതിലുള്ള പ്രതികാരമായാണ് പാമ്പിനെ കൊണ്ട് കടിപ്പിച്ചു കൊല്ലാന് ശ്രമം നടത്തിയത്. ജനലിലൂടെ പാമ്പിനെ മുറിയിലേക്ക് എറിയുകയായിരുന്നു.
രാത്രി പറമ്പില് കാല്പെരുമാറ്റം കേട്ട് നോക്കിയപ്പോള് കിച്ചു പാമ്പിനെ മുറിയിലേക്ക് എറിഞ്ഞിട്ട് മതില് ചാടി ഓടുന്നത് കണ്ടു. തുടര്ന്ന് രാജേന്ദ്രന് പാമ്പിനെ അടിച്ച് കൊല്ലാന് ശ്രമിച്ചെങ്കിലും പാമ്പിന്റെ വാല് ഭാഗം മാത്രമാണ് കിട്ടിയത്. പാമ്പ് രക്ഷപ്പെട്ടു.
രാജേന്ദ്രന് പൊലീസില് പരാതി നല്കിയെങ്കിലും ആദ്യം ഗൗരവത്തിലെടുത്തില്ല. എന്നാല് വാല് ഭാഗം പൊലീസിനെ കാട്ടിയതോടെ കിച്ചുവിനെ അറസ്റ്റ് ചെയ്യുകയായിരുന്നു.നിരവധി ക്രിമിനല് കേസുകളില് പ്രതിയാണ് ഇയാള്.പാമ്പിനെ മുറിയിലേക്ക് എറിഞ്ഞുവെന്ന് പ്രതി പൊലീസിനോട് സമ്മതിച്ചിട്ടുണ്ട്.
