തിരുവനന്തപുരം: അശാസ്ത്രീയ നിർമ്മാണത്തിൽ മ്യൂസിയത്തിനുള്ളിലെ അരനൂറ്റാണ്ടിലധികം പഴക്കമുള്ളകെട്ടിടം തകർന്നു. നേച്ചർ ഹിസ്റ്ററി മ്യൂസിയ(പ്രകൃതി ചരിത്ര പ്രദർശനാലയം)ത്തിന്റെ ഇരുനില കെട്ടിടമാണ് പൊളിഞ്ഞത്. ബലം പരിശോധിക്കാതെ എയർകണ്ടീഷൻ സ്ഥാപിച്ചതോടെ കെട്ടിടത്തിന്റെ പാരപ്പെറ്റ് തകർന്നുവീഴുകയായിരുന്നു. ആറ് എസിയും താഴേക്ക് പതിച്ചു. മുപ്പത് ലക്ഷത്തോളം രൂപയുടെ നഷ്ടം.
ശനിയാഴ്ച രാവിലെ എട്ടരമണിയോടെയാണ് കെട്ടിടത്തിൽ സ്ഥാപിച്ചിരുന്ന എസികളും കൂൾവാളും പാരപ്പെറ്റും താഴേക്ക് പതിച്ചത്. 1958ൽ തറക്കല്ലിട്ട് 1964ൽ തുറന്നുകൊടുത്ത ഇരുനില കെട്ടിടത്തിലാണ് നേച്ചർ ഹിസ്റ്ററിന്മ്യൂസിയം ആരംഭിച്ചത്. ഉറുമ്പുകൾ മുതൽ നീലത്തിമിംഗലംവരെയുള്ള ജന്തുലോകത്തെ ജീവികളെക്കുറിച്ചു എല്ലാ വിവരങ്ങളും ഇവിടെയുണ്ട്. ആറ് വർഷം മുമ്പാണ് സെൻട്രൽ കൂളിംഗ് സിസ്റ്റം സ്ഥാപിച്ചത്. അതിനായി പൊതുമരമാത്ത് വകുപ്പ് കെട്ടിട വിഭാഗം പരിശോധിക്കുകയും സെൻട്രൽ കൂളിംഗ് സിസ്റ്റം സ്ഥാപിക്കുന്നതിനുള്ള ബലം കെട്ടിടത്തിന് ഉണ്ടെന്നും കണ്ടെത്തിയിരുന്നു. തുടർന്ന് 21 ടൺ കൂളിംഗ് സിസ്റ്റത്തിനായി വിവിധ കപ്പാസിറ്റിയിലുള്ള എട്ട് എസികളും കൂൾ വാളുകളുകളും കെട്ടിടത്തിൽ ഘടിപ്പിച്ചു. പാരപ്പെറ്റിലും ചുവരുകളിലും ക്ലാമ്പുകൾ ഘടിപ്പിച്ചായിരുന്നു നിർമ്മാണം. എന്നാൽ കൂളിംഗ് സിസ്റ്റത്തിന്റെ ഭാരം താങ്ങാൻ ചുടുകല്ലിലും ചുണ്ണാമ്പ് ചുവരിലും സ്ഥാപിച്ച കെട്ടിടത്തിന് സാധിച്ചില്ല.
എട്ട് എസികളിൽ ആറെണ്ണം നിലത്തുവീണു. രണ്ടെണ്ണം ഏത് നിമിഷവും നിലത്തുവീഴും. പാരപ്പെറ്റ് പൂർണമായും തകർന്നു. കൂൾ വാളും നിലംപതിച്ചു. ചുവരുകളിലെ ചുണ്ണാമ്പ് ഭാഗവും നശിച്ചു. 30 ലക്ഷത്തോളം രൂപയുടെ നഷ്ടമുണ്ടെന്നാണ് വിലയിരുത്തൽ. തകർന്ന ഭാഗത്ത് ഇപ്പോൾ ടാർപ്പോളിൻ ഉപയോഗിച്ച് മറച്ചിരിക്കുകയാണ്. അതേസമയം സന്ദർശകരെ കെട്ടിടത്തിലേക്ക് കടത്തിവിടുന്നുണ്ട്. കെട്ടിടത്തിന് ചോർച്ചയുണ്ട്. മഴവെള്ളം മ്യൂസയത്തിനകത്തേക്ക് പതിക്കുന്നുണ്ട്. അതിനിടയിൽ കെട്ടിടത്തിൽ സോളാർ പാനലും സ്ഥാപിച്ചിരുന്നു. ചോർച്ചയ്ക്ക് പരിഹാരം കണ്ടില്ലെങ്കിൽ കെട്ടിടം മുഴുവൻ തകർന്നു വീഴുന്ന അവസ്ഥയാണ്.
