ന്യൂദല്ഹി : നടിയെ ആക്രമിച്ച കേസിന്റെ വിചാരണ പൂര്ത്തിയാക്കാന് സുപ്രീംകോടതി സമയം നീട്ടി നല്കി. വിചാരണ പൂര്ത്തിയാക്കി കേസില് വിധി പറയാന് കൂടുതല് സമയം അനുവദിച്ചു നല്കണമെന്ന വിചാരണക്കോടതി ജഡ്ജിയുടെ റിപ്പോര്ട്ട് പരിഗണിച്ചാണ് സുപ്രീംകോടതി സമയം നീട്ടി നല്കിയത്. അടുത്ത മാര്ച്ച് 31 വരെയാണ് സമയം നീട്ടി നല്കിയിരിക്കുന്നത്.
കേസിന്റെ വിചാരണ വേഗത്തില് പൂര്ത്തീകരിക്കണമെന്ന് സുപ്രീംകോടതി നിര്ദ്ദേശിച്ചിട്ടുണ്ട്. ജസ്റ്റിസുമാരായ അനിരുദ്ധ ബോസ്, ബേല എം. ത്രിവേദി എന്നിവരടങ്ങിയ സുപ്രീംകോടതി ബെഞ്ചാണ് പരിഗണിച്ചത്. കഴിഞ്ഞ തവണ കേസ് പരിഗണിച്ചപ്പോള് വിചാരണ ജൂലായ് 31 ന് ഉള്ളില് പൂര്ത്തിയാക്കണമെന്ന് സുപ്രീംകോടതി നിര്ദ്ദേശം നല്കിയിരുന്നതാണ്.
എന്നാല് സാക്ഷി വിസ്താരം പൂര്ത്തിയാക്കാന് മാത്രം മൂന്ന് മാസം വേണം. ആറ് സാക്ഷികളുടെ വിസ്താരം ഇനിയും പൂര്ത്തിയാക്കേണ്ടതുണ്ടെന്നും വിചാരണക്കോടതി ജഡ്ജി ഹണി എം. വര്ഗീസ് സുപ്രീംകോടതിയോട് ആവശ്യപ്പെടുകയായിരുന്നു.
നടിയെ ആക്രമിച്ച കേസില് മെമ്മറി കാര്ഡ് പരിശോധിച്ചതില് അന്വേഷണം ആവശ്യപ്പെടുന്നത് വിചാരണ നീട്ടിക്കൊണ്ടുപോകാനാണ്. തന്റെ ജീവിതമാണ് ഇതിലൂടെ നഷ്ടമാകുന്നത്. ദിലീപ് നേരത്തെ ഹൈക്കോടതിയില് ആരോപിച്ചിരുന്നു. കോടതിയുടെ കസ്റ്റഡിയിലിരിക്കെ മെമ്മറി കാര്ഡ് അനധികൃതമായി തുറന്ന സംഭവത്തില് കോടതി മേല്നോട്ടത്തില് അന്വേഷണം വേണമെന്ന് ആവശ്യപ്പെട്ട് അതിജീവിത നല്കിയ ഹര്ജിയിലാണ് ദിലീപ് നിലപാടറിയിച്ചത്.
