ആലപ്പുഴ: ഗൃഹനാഥന്റെ രണ്ടുകാലുകളും മുറിച്ചുനീക്കേണ്ടി വന്ന അപകടത്തിന് ഇടയാക്കിയ വാഹനം കണ്ടെത്താനാകാതെ പോലീസ് ഇരുട്ടില് തപ്പുന്നു. ചേര്ത്തല നഗരസഭ 27-ാം വാര്ഡ് തൈവെളി വീട്ടില് ഷാജി(52)യാണ് ഹതഭാഗ്യന്. കഴിഞ്ഞ 21ന് രാത്രി ഒന്പതിന് ശേഷമാണ് അപകടം നടന്നത്. ചേര്ത്തല കാര്ത്ത്യായനി ക്ഷേത്രത്തിന് പടിഞ്ഞാറ് വശത്ത് വഴിയോര കച്ചവടം നടത്തി മടങ്ങുമ്പോഴായിരുന്നു അപകടം. സെക്കിളില് സഞ്ചരിക്കുകയായിരുന്നു ഷാജി.
പോലീസ് സ്റ്റേഷന് തെക്ക് ഭാഗത്തുള്ള ജങ്ഷന് മുറിച്ചു കടക്കുമ്പോള് തെക്ക് നിന്നും വടക്കോട്ട് വന്ന ലോറി ഇടിച്ചായിരുന്നു അപകടം. ചേര്ത്തല പോലീസ് സ്റ്റേഷനിലെ സിസിടിവി ക്യാമറയില് അപകടത്തിന്റെ ദൃശ്യങ്ങള് പതിഞ്ഞിരുന്നു. ലോറി ഷാജിയുടെ ഇരുകാലുകളിലൂടെയുമാണ് കയറിയിറങ്ങിയത്. കോട്ടയം മെഡിക്കല് കോളേജ് ആശുപത്രിയില് ചികിത്സയില് കഴിയുന്ന ഷാജിയുടെ ഇരുകാലുകളും മുറിച്ചു നീക്കേണ്ടി വന്നു. അപകടം നടന്ന് പത്ത് ദിവസം കഴിഞ്ഞിട്ടും ചേര്ത്തല പോലീസിന് അപകടത്തിനിടയാക്കിയ വാഹനം കണ്ടെത്താനായിട്ടില്ല.
പലതവണ ബന്ധുക്കള് സ്റ്റേഷനില് കയറിയിറങ്ങിയെങ്കിലും പോലീസ് അലംഭാവം കാട്ടുന്നതായാണ് ആക്ഷേപം. വാഹനം കണ്ടെത്താന് നടപടി സ്വീകരിക്കണമെന്ന് ആവശ്യപ്പെട്ട് ഷാജിയുടെ മകള് ജില്ലാ പോലീസ് മേധാവിക്ക് പരാതി നല്കി.
