മൻ കി ബാത്തിൽ പ്രതിഫലിക്കുന്നത് ജനങ്ങളുടെ മനസ്സ് – കേന്ദ്ര സഹമന്ത്രി വി.മുരളീധരൻ, രാജ്യം മുഴുവൻ അനുകരിക്കേണ്ട പല മാതൃകകളും ജനങ്ങളിലെത്തി

തിരുവനന്തപുരം : പ്രധാനമന്ത്രി നരേന്ദ്ര മോദിയുടെ പ്രതിമാസ റേഡിയോ പരിപാടിയായ മൻ കി ബാത്തിൽ ജനങ്ങളുടെ മനസ്സാണ് പ്രതിഫലിക്കുന്നതെന്ന് കേന്ദ്ര വിദേശകാര്യ- പാർലമെന്ററികാര്യ സഹമന്ത്രി വി.മുരളീധരൻ പറഞ്ഞു. ജനതാത്പര്യങ്ങൾക്കനുസരിച്ച് രാജ്യത്തെ ഭരണനിർവ്വഹണത്തെ മാറ്റിയെടുക്കുന്നതിൽ മൻ കി ബാത്ത് നിർണായക പങ്ക് വഹിക്കുന്നതായും അദ്ദേഹം പറഞ്ഞു .  

മൻ കി ബാത്ത് 100 ലക്കങ്ങൾ പൂർത്തിയായതിന്റെ ഭാഗമായി നെഹ്‌റു യുവ കേന്ദ്ര സംഘടിപ്പിച്ച താലൂക്ക് / ജില്ലാതല ക്വിസ് മത്സരങ്ങൾ തിരുവനന്തപുരത്ത് ഉദ്ഘാടനം ചെയ്യുകയായിരുന്നു അദ്ദേഹം. രാജ്യം മുഴുവൻ അനുകരിക്കേണ്ട പല മാതൃകകളും ജനങ്ങളിലെത്തിച്ചതിലൂടെയാണ് മൻ കി ബാത്ത് കൂടുതൽ ജനകീയമായത്. പുതിയ അറിവുകളുടെയും വിജ്ഞാനത്തിന്റെയും ശേഖരമാണ് ഈ പരിപാടിയിലൂടെ പൊതുജനങ്ങൾക്ക് മുൻപിൽ പ്രധാനമന്ത്രി അവതരിപ്പിക്കുന്നതെന്ന് മുരളീധരൻ പറഞ്ഞു.  

ഖാദിയുടെ ഉപയോഗം പ്രോത്സാഹിപ്പിക്കുക, ഹർ ഘർ തിരംഗ, തദ്ദേശീയ കളിപ്പാട്ടങ്ങളുടെ നിർമ്മാണെം തുടങ്ങിയ ആശയങ്ങൾ പ്രധാനമന്ത്രി മൻ കി ബാത്തിൽ പരാമർശിക്കുകയും പിന്നീട് ജനങ്ങൾ അത് ഏറ്റെടുക്കുകയും ചെയ്തു. ഇത്തരം ജനകീയ മുന്നേറ്റങ്ങൾക്ക് കാരണമായ ഭൂരിഭാഗം ആശയങ്ങളും ജനങ്ങളിലേക്കെത്തിച്ച പരിപാടിയാണ് മൻ കി ബാത്തെന്നും കേന്ദ്ര സഹമന്ത്രി പറഞ്ഞു.  നെഹ്റു യുവകേന്ദ്ര സംഗതൻ സംസ്ഥാന ഡയറക്ടർ അനിൽകുമാർ.എം, ആരോഗ്യ സർവ്വകലാശാല മുൻ വൈസ് ചാൻസിലർ ഡോ. എം.കെ.സി നായർ തുടങ്ങിയവർ സന്നിഹിതരായിരുന്നു. മൻ കി ബാത്തിന്റെ 103-ാം ലക്കത്തിന്റെ പ്രദർശനവും വേദിയിൽ നടന്നു.