കേരളം നാണംകെട്ട് തലകുനിച്ചു നിൽക്കുന്നു; ക്രിമിനലുകളെ കൈകാര്യം ചെയ്യുന്ന യുപി മോഡൽ കേരളത്തിലും മാതൃകയാക്കണം: കെ.സുരേന്ദ്രൻ

കൊച്ചി: സ്ത്രീകൾക്കും കുട്ടികൾക്കുമെതിരായ അതിക്രമങ്ങൾ തടയുന്നതിൽ സംസ്ഥാന സർക്കാർ പരാജയപ്പെട്ട സാഹചര്യത്തിൽ യുപി മോഡൽ നടപ്പിലാക്കി കേരളത്തിലെ ക്രമസമാധാനം പുനസ്ഥാപിക്കണമെന്ന് ബിജെപി സംസ്ഥാന അധ്യക്ഷൻ കെ. സുരേന്ദ്രൻ. ആലുവയിൽ ക്രൂരമായ പീഡനത്തിനിരയായി കൊല്ലപ്പെട്ട അഞ്ച് വയസ്സുകാരിക്ക് അന്ത്യാഞ്ജലി അർപ്പിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.‌

കേരളത്തിൽ ക്രമസമാധാനം പൂർണമായും തകർന്നിരിക്കുകയാണ്. പോലീസ് സംവിധാനം പൂർണമായും തകർന്നു കഴിഞ്ഞു. ക്രിമിനലുകളെയും മാഫിയകളെയും കൈകാര്യം ചെയ്യുന്ന യുപി രീതി കേരളത്തിലും മാതൃകയാക്കണം. നമ്മുടെ ആഭ്യന്തര വകുപ്പ് പൂർണ്ണ പാരാജയമാണെന്നും അദ്ദേഹം കുറ്റപ്പെടുത്തി. കാണാതായി 18 മണിക്കൂറുകൾക്കഴിഞ്ഞിട്ടും കുഞ്ഞിനെ കണ്ടെത്താനാവത്തത് ചെറിയൊരു കാര്യമായി കാണാനാവില്ല. കേരളം നാണംകെട്ട് തലകുനിച്ചു നിൽക്കുകയാണെന്നും സുരേന്ദ്രൻ പറഞ്ഞു.

അതിഥിത്തൊഴിലാളികൾക്കിടയിലെ ലഹരി ഉപയോഗത്തെക്കുറിച്ചും, കുറ്റകൃതൃങ്ങളെക്കുറിച്ചു കൃത്വമായ അന്വേഷണം നടത്തേണ്ടതുണ്ട്. ഇതിനായി പ്രത്യേക പോലീസ് സംവിധാനം നടപ്പിലാക്കണം. സംസ്ഥാനത്തേക്ക് ആരെല്ലാം വരുന്നു, എന്തൊക്കെ ചെയ്യുന്നു എന്നൊക്കെ അന്വേഷിക്കാനുള്ള സംവിധാനങ്ങളൊന്നും കേരളാ പോലീസിനില്ല. നിരന്തരമായി കേട്ടുകേൾവിയില്ലാത്ത കാര്യങ്ങളാണ് കേരളത്തിൽ നടക്കുന്നതെന്നും സുരേന്ദ്രൻ പറഞ്ഞു.