കൊച്ചി : അഞ്ചുവയസ്സുകാരിയെ കൊലപ്പെടുത്തിയത് താനാണെന്ന് അസ്ഫാക് ആലം സമ്മതിച്ചതായി എസ്പി. പോലീസ് ചോദ്യം ചെയ്യലിലാണ് ഈ വെളിപ്പെടുത്തല്‍. കുട്ടിയെ സുഹൃത്തിന് കൈമാറിയെന്ന് പറഞ്ഞത് അന്വേഷണത്തെ വഴിതെറ്റിക്കുന്നതിനായിരുന്നെന്നും പോലീസ് അറിയിച്ചു.
വെള്ളിയാഴ്ച വൈകിട്ടോടെയാണ് ബീഹാര്‍ സ്വദേശികളായ ദമ്പതികളുടെ കുട്ടിയെ അസ്ഫാക് തട്ടിക്കൊണ്ടുപോകുന്നത്. ഇയാള്‍ കുഞ്ഞിന് ജ്യൂസ് വാങ്ങി നല്‍കിയശേഷം വിളിച്ചുകൊണ്ടുപോവുകയായിരുന്നു. തുടര്‍ന്ന് നടത്തിയ അന്വേഷണത്തില്‍ ഇയാള്‍ തൃശൂരിലേക്ക് പോകുന്ന കെഎസ്ആര്‍ടിസിയില്‍ കയറുന്നതും പിന്നീട് അവിടെ തന്നെ ഇറങ്ങുന്നതും കണ്ടിരുന്നു. പോലീസ് പിടിയിലായ ഇയാള്‍ അമിതമായി മദ്യപിച്ചിരുന്നു.
കുഞ്ഞിനെ സുഹൃത്തിന് നല്‍കിയെന്നാണ് പറഞ്ഞിരുന്നത്. അതുകൊണ്ടുതന്നെ ഇയാള്‍ കുഞ്ഞിനെ വിറ്റതാണോയെന്നും സംശയിച്ചു. ഇതിനെ തുടര്‍ന്ന് മറ്റ് ജില്ലകളിലേക്കും അന്വേഷണവും വ്യാപിപ്പിച്ചു. അതിനിടയിലാണ് ആലുവ മാര്‍ക്കറ്റിന് സമീപത്തായി കുട്ടിയുടെ മൃതദേഹം കണ്ടെത്തിയത്.
അതിനിടെ അസ്ഫാക്കിനെ ആലുവ മാര്‍ക്കറ്റില്‍ തെളിവെടുപ്പിനെത്തിച്ചിരുന്നുവെങ്കിലും ജനങ്ങള്‍ പ്രതിഷേധവുമായി എത്തിയതോടെ തെളിവെടുക്കാനാവാതെ പോലീസ് മടങ്ങി. നിയന്ത്രിക്കാനാവാത്ത വിധത്തില്‍ ജനങ്ങള്‍ പ്രതിഷേധിക്കുകയും വാഹനം തടഞ്ഞതോടെയുമാണ് പോലീസ് പ്രതിയുമായി മടങ്ങിയത്.
പ്രതികരിക്കാൻ ഇവിടെ എഴുതുക: