വയനാട്: മുട്ടിൽ മരംമുറി കേസിൽ ഭൂവുടമകളുടെ പേരിൽ നൽകിയ ഏഴ് അപേക്ഷകളും വ്യാജമെന്ന് പോലീസ് കണ്ടെത്തി. മരം മുറിക്കാൻ വില്ലേജ് ഓഫീസിൽ നൽകിയ അപേക്ഷകളാണ് വ്യാജമെന്ന് ഫോറൻസിക് റിപ്പോർട്ടിൽ കണ്ടെത്തിയത്. അപേക്ഷ എഴുതി തയ്യാറാക്കി ഒപ്പിട്ടത് പ്രതികളിലൊരാളായ റോജി അഗസ്റ്റിനാണെന്ന് കൈയക്ഷര പരിശോധനയിൽ തെളിഞ്ഞു.
കത്തുകൾ വില്ലേജ് ഓഫീസിൽ സമർപ്പിച്ചത് ആൻ്റോ അഗസ്റ്റിൻ, റോജി അഗസ്റ്റിൽ എന്നിവരായിരുന്നു. വനവാസികളുടെയും ചെറുകിട കർഷകരുടെയും പേരിലാണ് വ്യാജ അപേക്ഷ തയ്യാറാക്കിയിരിക്കുന്നത്. പട്ടയ ഭൂമിയുടെ ഉടമകൾ മരം മു റിക്കാൻ നൽകിയ അനുമതിപ്പത്രം വില്ലേജ് ഓഫീസിൽ സമർപ്പിക്കാൻ നിർദേശിച്ചിരുന്നു. ഇതിന്റെ അടിസ്ഥാനത്തിൽ സമർപ്പിക്കപ്പെട്ട ഏഴ് അപേക്ഷകളാണ് വ്യാജമെന്ന് കണ്ടെത്തിയത്. നേരത്തെ മുട്ടിൽ വില്ലേജ് ഓഫീസിൽ നിന്നും വ്യാജ അപേക്ഷകൾ പോലീസ് കണ്ടെത്തിയിരുന്നു.
പ്രതികളുടേത് ഉൾപ്പെട്ട 65 ഉടമകളിൽ നിന്ന് മരം മുറിച്ച് കടത്തിയിട്ടുണ്ട്. ഭുപരിഷ്കരണ നിയമത്തിന്റെ ഭാഗമായി നൽകിയ സർക്കാർ ഉത്തരവിന്റെ മറവിലാണ് ആദിവാസി ഭൂമിയിൽ നിന്നുപോലും അഗസ്റ്റിൻ സഹോദരങ്ങള് 104 മരങ്ങള് മുറിച്ചു കടത്തിയത്. ഭൂ പരിഷ്ക്കരണ നിയമം വന്നതിന് ശേഷം പട്ടയം നൽകിയ ഭൂമികളിൽ കിളിർത്തതോ വെച്ചുപിടിപ്പിച്ചതോ ആയ മരങ്ങൾ മാത്രമാണ് ഈ നിയമപ്രകാരം മുറിക്കാൻ അനുമതിയുള്ളത്. എന്നാൽ 300 വർഷത്തിൽ കൂടുതൽ പഴക്കമുള്ള രാജകീയ വൃക്ഷങ്ങൾ അടക്കമാണ് സർക്കാർ ഉത്തരവിന്റെ മറവിൽ മുറിച്ചു മാറ്റിയതെന്ന് ഡിഎൻഎ പരിശോധനയിൽ വ്യക്തമായിരുന്നു.
ഡി എൻ എ പരിശോധനയിൽ മരത്തിന്റെ അവശേഷിച്ച കുറ്റിയും മുറിച്ചു കടത്തിയ മരത്തടിയും ഒന്നാണെന്ന് കണ്ടെത്തിയിരുന്നു. ഇതിന്റെയെല്ലാം അടിസ്ഥാനത്തിൽ പോലീസ് കുറ്റപത്രം തയാറാക്കി അടുത്ത മാസത്തിനുള്ളിൽ തന്നെ സമർപ്പിച്ചേക്കും.
