തിരുവനന്തപുരം: സംസ്ഥാനത്ത് അതി ദാരിദ്ര്യം നിര്‍മാര്‍ജനം ചെയ്യുന്നതിന്റെ ഭാഗമായി സംസ്ഥാന സര്‍ക്കാര്‍ നടപ്പാക്കുന്ന പദ്ധതിയുടെ ഭാഗമായി ജില്ലയിലെ അതിദരിദ്രരെ മന്ത്രിമാരായ വി. ശിവന്‍കുട്ടി, ജി.ആര്‍ അനില്‍, ആന്റണി രാജു എന്നിവര്‍ നേരില്‍ കാണും.
കരുതലും കൈത്താങ്ങും താലൂക്ക് തല അദാലത്തുകളുടെ തുടര്‍ച്ചയായുള്ള ജില്ലാതല അവലോകന യോഗത്തില്‍ മന്ത്രി വി. ശിവന്‍കുട്ടിയാണ് ഇക്കാര്യം അറിയിച്ചത്. പരിപാടിയുടെ ഭാഗമായി താലൂക്ക് തലത്തില്‍ അതി ദരിദ്രരുടെ പ്രത്യേക ക്യാമ്പുകള്‍ മന്ത്രിമാരുടെ സാന്നിധ്യത്തില്‍ സംഘടിപ്പിക്കും. ജനപ്രതിനിധികളും വിവിധ ഉദ്യോഗസ്ഥരും ക്യാമ്പില്‍ പങ്കെടുക്കും. ജില്ലയില്‍ ആകെ 7,278 പേരാണ് അതിദരിദ്രരുടെ പട്ടികയില്‍പ്പെടുന്നത്.
ഇതില്‍ 6,226 പേര്‍ ഗ്രാമപഞ്ചായത്ത് പ്രദേശത്തും 471 പേര്‍ മുനിസിപ്പാലിറ്റികളിലും 591 പേര്‍ കോര്‍പ്പറേഷന്‍ പരിധിയിലും ആണ്. അതിദാരിദ്ര്യ നിര്‍മാര്‍ജന പദ്ധതിയുടെ ഭാഗമായി അടിയന്തരാവശ്യങ്ങളായ ഭക്ഷണം, മരുന്ന്, പാര്‍പ്പിടം എന്നിവ ആവശ്യമുള്ളവര്‍ക്ക് നല്‍കുന്നതിനായി എല്ലാ തദ്ദേശ സ്വയംഭരണ സ്ഥാപനങ്ങളും നടപടി സ്വീകരിച്ചിട്ടുണ്ടെന്ന് ബന്ധപ്പെട്ട ഉദ്യോഗസ്ഥര്‍ യോഗത്തെ അറിയിച്ചു.
ഭക്ഷണം ആവശ്യമായ 3,479 പേരില്‍ 2,392 പേര്‍ക്ക് ഭക്ഷ്യധാന്യ കിറ്റായും പാചകം ചെയ്യാന്‍ കഴിയാത്ത 187 പേര്‍ക്ക് പാകം ചെയ്ത ഭക്ഷണവും നല്‍കി വരുന്നുണ്ട്. അതിദരിദ്ര കുടുംബങ്ങളിലെ സ്‌കൂള്‍ കുട്ടികളായി കണ്ടെത്തിയ 167 വിദ്യാര്‍ത്ഥികളില്‍ എല്ലാവര്‍ക്കും തദ്ദേശസ്വയംഭരണ സ്ഥാപന ഭരണസമിതിയുടെ നേതൃത്വത്തില്‍ ആവശ്യമായ പഠനോപകരണങ്ങള്‍ വിതരണം ചെയ്തിട്ടുണ്ട്.
വിവിധ അവകാശ രേഖകള്‍ ലഭ്യമാക്കുന്ന ‘അവകാശം അതിവേഗം’ പരിപാടിയുടെ ഭാഗമായി 338 പേര്‍ക്ക് ആധാര്‍ കാര്‍ഡും 262 പേര്‍ക്ക് റേഷന്‍ കാര്‍ഡും 376 പേര്‍ക്ക് വോട്ടര്‍ ഐഡിയും 160 പേര്‍ക്ക് ആരോഗ്യ ഇന്‍ഷുറന്‍സ് കാര്‍ഡും 28 പേര്‍ക്ക് തൊഴിലുറപ്പ് കാര്‍ഡ് ആയ ജോബ് കാര്‍ഡും 58 പേര്‍ക്ക് സാമൂഹ്യ സുരക്ഷാ പെന്‍ഷനും ലഭ്യമാക്കിയിട്ടുണ്ട്.
അതിദരിദ്ര പട്ടികയില്‍ ഉള്‍പ്പെട്ട 73 പേര്‍ക്ക് ലൈഫ് ഭവന പദ്ധതി പ്രകാരം വീട് നിര്‍മ്മാണത്തിന് കരാര്‍ വച്ച് പണി പുരോഗമിക്കുകയാണ്. അവകാശ രേഖകളില്‍ 120 പേര്‍ക്ക് വോട്ടര്‍ കാര്‍ഡ്, 118 പേര്‍ക്ക് ആധാര്‍ കാര്‍ഡ്, 432 പേര്‍ക്ക് ആരോഗ്യസുരക്ഷാ കാര്‍ഡ്, 88 പേര്‍ക്ക് സാമൂഹ്യ സുരക്ഷ പെന്‍ഷന്‍, 58 പേര്‍ക്ക് ബാങ്ക് അക്കൗണ്ട് തുടങ്ങിയവ വിവിധ കാരണങ്ങള്‍ മൂലം നല്‍കാന്‍ ബാക്കിയുണ്ട്.
ഇനിയും അവകാശരേഖകളും മറ്റു സഹായങ്ങളും ലഭ്യമാകാന്‍ ബാക്കിയുള്ള അതിദരിദ്രരെ മന്ത്രിമാര്‍ നേരില്‍ കണ്ട് അവരുടെ പ്രശ്‌നങ്ങള്‍ മനസ്സിലാക്കുകയാണ് പരിപാടിയിലൂടെ ലക്ഷ്യമിടുന്നത്. അവലോകന യോഗത്തില്‍ മന്ത്രിമാരെ കൂടാതെ ജില്ലാ കളക്ടര്‍ ജെറോമിക് ജോര്‍ജ്, എ ഡി എം അനില്‍ ജോസ്, സബ് കളക്ടര്‍ അശ്വതി ശ്രീനിവാസ്, വിവിധ വകുപ്പുകളിലെ ഉദ്യോഗസ്ഥര്‍ തുടങ്ങിയവരും പങ്കെടുത്തു.
പ്രതികരിക്കാൻ ഇവിടെ എഴുതുക: