ലണ്ടന്‍: വിംബിള്‍ഡന്‍ പുരുഷ ഡബിള്‍സില്‍ ഇന്ത്യന്‍ താരം രോഹന്‍ ബൊപ്പണ്ണയ്‌ക്കും സഖ്യതാരത്തിനും വിജയത്തുടക്കം. ഓസ്‌ട്രേലിയയുടെ മാത്യൂ എബ്‌ഡെന്‍ ആണ് ബൊപ്പണ്ണയുടെ സഖ്യതാരം. അര്‍ജന്റൈന്‍ ജോഡികളായ ഗില്ലര്‍മോ ഡുറാന്‍-തോമസ് എച്ചവെറി സഖ്യത്തെയാണ് ഇന്തോ-ഓസ്‌ട്രേലിയന്‍ സഖ്യം പരാജയപ്പെടുത്തിയത്.
ടൂര്‍ണമെന്റില്‍ ആറാം സീഡ് ജോഡികളായിറങ്ങിയ ബൊപ്പണ്ണ-എബ്‌ഡെന്‍ സഖ്യം കടുത്ത പോരാട്ടത്തിനൊടുവിലാണ് വിജയം നേടിയത്. രണ്ട് മണിക്കൂര്‍ 12 മിനിറ്റ് നേരം മത്സരം നീണ്ടു. സ്‌കോര്‍: 6-2, 6-7(5-7), 7-6(10-8).
43കാരനായ ബൊപ്പണ്ണയും 35കാരനായ എബ്‌ഡെനും അടങ്ങുന്ന ജോഡി ഇക്കൊല്ലം രണ്ട് എടിപി ടൈറ്റിലുകള്‍ നേടിയിട്ടുണ്ട്. ഇരുവര്‍ക്കും രണ്ടാം റൗണ്ടില്‍ സീഡില്ലാ താരങ്ങളായ ബ്രിട്ടീഷ് ജോഡികളെയാണ് നേരിടേണ്ടത്. ഞായറാഴ്ചയാണ് മത്സരം.
ഇന്ന് നടക്കുന്ന മിക്‌സഡ് ഡബിള്‍സ് മത്സരത്തിലും ബൊപ്പണ്ണ കളിക്കും. കാനഡക്കാരി ഗബ്രിയേല ഡബ്രോവ്‌സ്‌കി ആണ് മിക്‌സഡ് ഡബിള്‍സില്‍ ബൊപ്പണ്ണയുടെ സഹതാരം. ക്രൊയേഷ്യ-ചൈനീസ് തായ്‌പേയ് ജോഡികളായ ഇവാന്‍ ഡോഡിഗ്-ലാടിഷ കാന്‍ ആണ് ആദ്യമത്സര എതിരാളികള്‍.
പ്രതികരിക്കാൻ ഇവിടെ എഴുതുക: