ആലപ്പുഴ : വില്‍പ്പനക്കായി ട്രെയിനില്‍ കടത്തിക്കൊണ്ടുവന്ന 3.550കിലോ കഞ്ചാവുമായി രണ്ട് യുവാക്കള്‍ പിടിയില്‍. അടൂര്‍ പയ്യനല്ലൂര്‍ മീനത്തേതില്‍ വീട്ടില്‍ സുമേഷ്(26), കൊല്ലം ജില്ലയില്‍ ആനയടി, ശൂരനാട് നോര്‍ത്ത് വിഷ്ണുഭവനത്തില്‍ വിഷ്ണു(23)എന്നിവരെയാണ് ആലപ്പുഴ റെയില്‍വേ സ്റ്റേഷന് സമീപത്തു നിന്ന് ആലപ്പുഴ എക്‌സൈസ് എന്‍ഫോഴ്‌സ്‌മെന്റ് ആന്‍ഡ് ആന്റിര്‍ക്കോട്ടിക് സ്‌പെഷ്യല്‍ സ്‌കോഡ് സിഐ എം മഹേഷും സംഘവും പിടികൂടിയത്. ഇവര്‍ സ്ഥിരമായി ഒറീസയില്‍ പോയി കഞ്ചാവ് വലിയ തോതില്‍ വാങ്ങി ആലപ്പുഴ ജില്ലയുടെ തെക്കന്‍ ഭാഗങ്ങളായ കായംകുളം, താമരക്കുളം നുറനാട് ഭാഗങ്ങളിലേക്കാണ് എത്തിച്ചിരുന്നത്.
ട്രെയിനില്‍ ചേര്‍ത്തലയിലോ ആലപ്പുഴയിലോ ഇറങ്ങി ബസ് മാര്‍ഗ്ഗമാണ് ഇവര്‍ കഞ്ചാവ് കടത്തുന്നത്. പിടിക്കപ്പെടാതിരിക്കുന്നതിന് വേണ്ടി ഒറീസയില്‍ നിന്ന് രാത്രിയിലുള്ള ട്രെയിനുകളില്‍ കയറുകയും ഈ സമയം മറ്റുള്ളവര്‍ ഉറങ്ങുന്ന സമയത്ത് ടോയ്‌ലറ്റിന്റെ മുകള്‍ ഭാഗത്തെ പ്ലൈവുഡിന്റെ സ്‌ക്രൂ അഴിച്ച് മാറ്റി കഞ്ചാവ് പൊതി ഒളിപ്പിക്കുകയാണ് പതിവ്. ഇറങ്ങാന്‍ സമയമാകുമ്പോള്‍ പ്ലാാറ്റ്‌ഫോമില്‍ മറ്റ് പരിശോധന ഇല്ലന്ന് ഉറപ്പാക്കിയ ശേഷമാണ് കഞ്ചാവുമായി ഇറങ്ങാറുള്ളത്. സുമേഷ് നിരവധി ക്രിമിനല്‍ കേസുകളില്‍ പ്രതിയും കാപ്പാനിയമ പ്രകാരം ജയിലില്‍ കിടന്നിട്ടുള്ളയാളുമാണ്.
ഇവര്‍ കഞ്ചാവ് വാങ്ങാന്‍ പുറപ്പെട്ടപ്പോള്‍ തന്നെ നാര്‍ക്കോട്ടിക് സ്‌ക്വാഡിന് രഹസ്യ വിവരം കിട്ടിയിരുന്നു. ഇവര്‍ ആലപ്പുഴ റെയില്‍വേ സ്റ്റേഷനില്‍ ഇറങ്ങി ബസ് കാത്ത് നില്‍ക്കുമ്പോഴാണ് പിടിക്കപ്പെടുന്നത്. പ്രിവന്റീവ് ഓഫീസര്‍ ജി. ഗോപകുമാര്‍, പ്രവന്റീവ് ഓഫീസര്‍ ഗ്രേഡ് സജിമോന്‍ കെ. പി, സിവില്‍ എക്‌സൈസ് ഓഫീസര്‍മാരായ ശ്രീജിത്ത്. എസ്, റഹീം എസ് ആര്‍, അരുണ്‍ എസ് , കെ.ടി കലേഷ്,ദിലീഷ് എസ്, സന്തോഷ്, ഡ്രൈവര്‍ പ്രദീപ് എന്നിവരും ഉണ്ടായിരുന്നു.
പ്രതികരിക്കാൻ ഇവിടെ എഴുതുക: