അമ്പലപ്പുഴ: കുടിവെള്ളം കിട്ടാക്കനി, ഒരു പ്രദേശമാകെ ദുരിതത്തില്. അമ്പലപ്പുഴ തെക്ക് പഞ്ചായത്ത് ഏഴാം വാര്ഡ് പന്നക്കളം പ്രദേശത്താണ് മാസങ്ങളായി ശുദ്ധജലം ലഭ്യമല്ലാത്തത്.കരുമാടി പമ്പ്ഹൗസില് നിന്നാണ് ഇവിടെ കുടിവെള്ളമെത്തുന്നത്. ഇവിടുത്തെ മോട്ടോര് തകരാറായതാണ് കുടിവെള്ള വിതരണത്തിന് തടസമായിരിക്കുന്നത്. എന്നാല് മാസങ്ങള് കഴിഞ്ഞെങ്കിലും മോട്ടോറിന്റെ തകരാര് മാറ്റി കുടിവെള്ള പ്രശ്നം പരിഹരിക്കാന് അധികൃതര് ഇതുവരെ തയാറായിട്ടില്ല.
പ്രദേശത്തെ നൂറ് കണക്കിന് കുടുംബങ്ങളാണ് ഇത് മൂലം ദുരിതത്തിലായിരിക്കുന്നത്. വള്ളവുമായി കിലോമീറ്ററുകള് താണ്ടി തകഴി ഭാഗത്തുനിന്നുമാണ് ഇവിടുത്തുകാര് കുടിവെള്ളം ശേഖരിക്കുന്നത്. പഞ്ചായത്തടക്കം വിവിധ വകുപ്പധികൃതര്ക്ക് നിരവധി പരാതി നല്കിയെങ്കിലും യാതൊരു നടപടിയും ഉണ്ടായില്ല. ഇതേ തുടര്ന്ന് പ്രദേശ വാസികള് ആഴ്ചകള്ക്ക് മുമ്പ് പരാതിയുമായി ജില്ലാ കളക്ടറെ സമീപിച്ചിരുന്നു. ഒരാഴ്ചക്കകം കുടിവെള്ള പ്രശ്നം പരിഹരിക്കുമെന്ന് കളക്ടര് ഉറപ്പ് നല്കിയെങ്കിലും അതും പാലിക്കപ്പെട്ടില്ല. ഇനിയും അനാസ്ഥ തുടര്ന്നാല് സമര പരിപാടികളുമായി മുന്നോട്ട് പോകാനാണ് നാട്ടുകാരുടെ തീരുമാനം.
