മൊറേന: മധ്യപ്രദേശിലെ മൊറേന ജില്ലയില്‍ മധ്യവയസ്‌ക്കന്‍ തന്റെ മകളെയും കാമുകനെയും കൊലപ്പെടുത്തിയ ശേഷം മൃതദേഹം ചമ്പല്‍ നദിയില്‍ ഉപേക്ഷിച്ചതായി പോലീസ് റിപ്പോര്‍ട്ട്.
പ്രതി കുറ്റസമ്മതം നടത്തിയതോടെയാണ് സംഭവം പുറത്തറിഞ്ഞത്. ഇതിനു പിന്നാലെ ഒരു സംഘം പോലീസ് ചമ്പല്‍ നദിയുടെ തീരത്തുള്ള റെഹ് ഘട്ടിലെത്തി മൃതദേഹങ്ങള്‍ പുറത്തെടുക്കുന്നതിനായി സംസ്ഥാന ദുരന്തനിവാരണ സേനയെയും (എസ്ഡിആര്‍എഫ്) മുങ്ങല്‍ വിദഗ്ധരെയും വിന്യസിച്ചു.
രത്തന്‍ ബസായ് ഗ്രാമവാസിയായ രാജ്പാല്‍ തോമര്‍ തന്റെ മകളെ കാണാതായതായി ജൂണ്‍ മൂന്നിന് പരാതി നല്‍കിയതായി അംബ എസ്ഡിപിഓ പരിമള്‍ സിംഗ് മെഹ്‌റ പറഞ്ഞു. തൊട്ടടുത്ത ദിവസം പുര ബര്‍ബായ് നിവാസിയായ കൊല്ലപ്പെട്ട യുവാവിന്റെ കുടുംബാംഗങ്ങള്‍ കാണാനില്ലെന്ന പരാതി നല്‍കി.
ഇവരുടെ പരാതിയുടെ അടിസ്ഥാനത്തിലാണ് പോലീസ് അന്വേഷണം ആരംഭിച്ചത്. ഇരകള്‍ രണ്ടുപേരും ഒരേ പ്രായത്തിലുള്ളവരായതിനാലും സമയവും ഒരുപോലെയായതിനാലും പോലീസിന് സംശയം തോന്നി. തുടര്‍ന്ന് ഇരുവരുടെയും കോള്‍ വിശദാംശങ്ങള്‍ പരിശോധിച്ചു. ഇതേതുടര്‍ന്നാണ് ഇവരുടെ ബന്ധത്തെ കുറിച്ച് പോലീസ് മനസ്സിലാക്കിയത്.
പിന്നാലെ പോലീസ് നടത്തിയ ശക്തമായ അന്വേഷണത്തില്‍ പെണ്‍കുട്ടിയുടെ പിതാവ് രാജ്പാല്‍ തോമറിനെ ചോദ്യം ചെയ്തതിനെ തുടര്‍ന്നാണ് പ്രതി കുറ്റം സമ്മതിച്ചത്. മകള്‍ക്കൊപ്പം കാമുകനെയും കൊന്ന് നദിയില്‍ എറിഞ്ഞുവെന്നും പ്രതി വെളിപ്പെടുത്തി. സംഭവത്തില്‍ കൂടുതല്‍പേര്‍ ഉള്‍പ്പെട്ടിട്ടുണ്ടോയെന്ന് പോലീസ് അന്വേഷിച്ച് വരികയാണ്. എന്നാല്‍ മൃതദേഹം വീണ്ടെടുക്കുന്നതുവരെ കൊലപാതകം പൂര്‍ണ്ണമായി സ്ഥാപിക്കാന്‍ കഴിയില്ലെന്നു പോലീസ് കൂട്ടിച്ചേര്‍ത്തു. സംഭവത്തില്‍ പോലീസ് കൂടുതല്‍ അന്വേഷണം നടത്തിവരികയായിരുന്നു.
പ്രതികരിക്കാൻ ഇവിടെ എഴുതുക: